Publiká riba 22 Yüli 2026
Willemstad – Djárason, 22 di yüli 2026, Konseho di Minister a risibí un presentashon di e ‘Startnotitie: Ruimtelijk Economisch Strategie (RES) 2040’ ku ta karga e título “Mihó pa tur”. Ministerio di Tráfiko, Transporte i Planifikashon Urbano (VVRP) ta responsabel pa e trayekto aki huntu ku Ministerio di Salubridat, Medio Ambiente i Naturalesa (GMN) i Ministerio di Desaroyo Ekonómiko (MEO).
Ta importante pa komo pais por yega na un kuadro ku ta definí unda ta bai desaroyá aktividatnan ekonómiko, e infrastruktura ku ta nesesario i kon esaki por ser aloká den e espasio urbano ku ta disponibel. E nota di inisio presentá a duna un bista di e situashon aktual i e importansia pa desaroyá e strategia, i e áreanan di enfoke i direkshon ku ta proponé. Tur esaki konektá na e aktual Programa di Gobernashon 2025-2029.
Sr. Dwigno Puriel, Sekretario General di Ministerio VVRP, sr. Luello Girigorie, Sekretario General a.i. di Ministerio di Desaroyo Ekonómiko i sr. Sharlon Melfor, Sekretario General di Ministerio GMN tabata presente i a ser kompañá pa sr. Noricson Felipie, Beleidsmedewerker na Ministerio VVRP, i eksperto lokal Jacques Heide ku a duna e presentashon.
