Publiká riba 06 Febrüari 2020
WILLEMSTAD – Durante di un seshon hopi interesante na Universidat di Kòrsou Dr. Moises Da Costa Gomez (UoC), Promé Minister sr. Eugene Rhuggenaath, a risibí un presentashon amplio di e proyekto ‘Living Lab’ ku a introdusí durante 2019 na nos universidat. Ta trata aki di un proyekto a base di un kolaborashon intensivo entre Gobièrnu di Kòrsou, UoC i instituto di investigashon TNO (Toegepast-Natuurwetenschappelijk Onderzoek), pa yega na solushonnan duradero tokante prinsipalmente transishon di energía duradero, planifikashon di espasio urbano i mobilidat di nos poblashon.
Den e último lunanan ku a pasa, alrededor di 20 studiante di entre otro Fakultat di Siensia Tékniko a para ketu na diferente problemátika den e áreanan menshoná atraves di un sistema di simulashon asina yamá “Digital Twin’’; ohochi digital di Kòrsou. Ku e ‘Digital Twin’ ta bira posibel pa investigá vários senario di simulashon i di e forma aki yega na posibel solushonnan optimal, inovativo i duradero ku por yuda den e proseso di traha maneho i finalmente tomo di desishon. Pa por hasi esaki, e studiantenan ta trahando estrechamente ku Ministerio di Tráfiko, Trasporte i Planifikashon Urbano, pero tambe a aserká diferente instansia tantu den Gobièrnu komo den sektor privá pa kolektá datonan.
E benefisionan pa ku e proyekto aki ta amplio, for di mehorá transporte públiko, krea oportunidatnan ekonómiko sostenibel, drecha kalidat di bida i inklushon sosial, te ku krea mihó kolaborashon entre Gobièrnu, sektor privá i akadémikonan, bin ku mas kupo di trabou i transferensia di konosementu. Banda di esei e proyekto di ‘Digital Twin’ ta unu hopi spesial debí na e echo ku ta na algun parti di mundu, esta na Hulanda, Belgika, Singapur i awor na Kòrsou, tin un laboratorio di e estilo aki desaroyá.
Promé Minister Rhuggenaath a keda impreshoná di tur informashon ku el a risibí di e dosente i studiantenan di UoC tokante e proyekto i ta mira potensial grandi no solamente pa ku desaroyo di Kòrsou, pero pa ku desaroyo di nos kapital humano, en partikular nos hóbennan ku por traha mas ‘data-driven’ i por sigui desaroyá nan mes di forma profeshonal i personal. Esaki sea na Kòrsou mes i/òf atraves di programanan di interkambio den eksterior. Na final di e presentashon e studiantenan presente tambe a presentá nan proyekto di ‘Smart Agriculture’ ku ta un proyekto sostenibel dirigí riba kultivashon di fruta i bèrdura orgániko ku sistemanan moderno. Un proyekto ku ya pa fin di e aña aki mester keda realisá i ku tambe ta di gran relevansia pa e vishon di Gabinete Rhuggenaath.
Durante aña 2020 Gobièrnu di Kòrsou lo sigui risibí resultadonan konkreto di e proyekto ‘Digital Twin’ ku lo trese mas oportunidat pa kontinuá i amplia e kolaborashon entre e partidonan envolví na benefisio di komunidat di Kòrsou, komo ‘Living Lab’ na kaminda pa ‘Smart Nation’.
