Publiká riba 09 Mart 2020
Willemstad – E barku di krusero MS Braemar, di e liña di krusero Fred. Olsen, ta mara na Kòrsou mañan, djamars dia 10 di mart, sin ku niun pasahero ni miembro di e tripulashon tin mag di sali subi nos isla. Esei ta un desishon di Ministerio di GMN, despues ku e liña krusero mes a notifiká outoridatnan na Kòrsou, ku nan tin 3 tripulante i un pasahero na bordo ku un probabilidat di tin Corona vírùs.
E ekspertonan di GMN lo subi e barku i hasi e tèstnan nesesario. Nan lo tuma e muestranan bistí kompletamente segun protokòl di seguransa. E kompania di krusero ta paga tur gastu mará na e investigashon di laboratorio. Ningun otro hende, ku no ta e profeshonalnan di GMN, lo subi e barku. E barku ta sali di Kòrsou mañan mes.
E liña di krusero mes a bati alarma, ora un hende ku tabata na bordo resientemente, a tèst positivo pa e vírùs, un par di dia despues ku a desembarká. Den e dianan ku a pasa, 4 hende ku ta riba e barku aworaki, a kuminsá haña sintoma di COVID-19. Por lo menos unu di nan ta tin kontakto ku e persona kende a test positivo.
Riba e barku, e dòkter a tuma tur medida nesesario, dor di pone e hendenan konserní den isolashon. Ora GMN duna resultado di e tèstnan riba e 4 pasaheronan, e liña krusero por sigui ku nan mes protokòlnan tokante e kaso.
