WILLEMSTAD – Ministerio di Desaroyo Ekonómiko (MEO) pa medio di e komunikado aki ta informá ku e moratorio ku a keda introdusí riba standplaats i venten (benta ambulante) kantu di òf riba playanan públiko, ta keda prolongá ku un periodo di tres (3) luna te ku 4 di aprel 2026.
E prolongashon aki ta nesesario pa por kompletá e análisis di e situashon aktual na playanan públiko i tambe pa por finalisá e maneho pa standplaats kantu di òf riba playanan públiko, den estrecho kolaborashon ku Ministerio di Salubridat, Medio Ambiente i Naturalesa (GMN) i tambe Ministerio di Tráfiko, Transporte i Planifikashon Urbano (VVRP).
E moratorium ta keda aplikabel pa tur petishon pa standplaats i venten kantu di òf riba playanan públiko durante e periodo di prolongashon.
MEO ta gradisí komunidat pa e komprenshon i ta reiterá ku e prolongashon aki ta kontribuí na desaroyo di un maneho transparente pa playanan públiko, balansá i duradero ku ta tene kuenta ku medio ambiente, turismo i e interesnan lokal.
