Publiká riba 13 Novèmber 2018
Willemstad – Di novèmber pa desèmber di e aña aki doñonan di propiedat imobil (kas, apartamento, edifisio, tereno bashi) lo risibí nan papel di belasting (aanslag) definitivo OnroerendeZaakBelasting (OZB) 2014 i papel di belasting OZB 2018. Manera ta konosí e lei aki a drenta na vigor na 2014 remplasando e lei di grondbelastingverordening 1908. Pa e lei por funshoná den su totalidat mester a hasi taksashon di turkas. For di kuminsamentu tabata konosí pa Inspectie i gobièrnu ku e proseso aki lo tuma su tempu. E oraei Inspectie a disidí na saka papel di belasting temporal (voorlopige aanslag) pendiente finalisá e prosesodi taksashon. E proseso a dura 4 aña i den tur e añanan aki, esta 2014, 2015, 2016 i 2017, Inspectie a manda papel di belasting temporal OZB.
Den un kaso kontra di Inspektor di Belasting korte a disidí e aña aki ku Inspectie por saka solamente papel di belasting definitivo. E sentensia di korte tin impakto tambe riba e papel di belasting temporal OZB ku Inspectie a saka na 2014, 2015, 2016 i 2017. Inspectie mester destruí (vernietig) nan tur i na su lugá manda e papel di belasting definitivo OZB pa tur doño di un propiedat inmobil. Inspectie a kuminsá ku destrukshon di papel di belasting temporal 2014. Durante e promé siman di novèmber pa fin di desèmber tur doño di un propiedat imobil lo risibí su papel di belasting definitivo di OZB di aña 2014 i 2018.
E prosedura ta ku na momento ku Inspectie destruí e papel di belasting temporal e pago hasí ta bira liber. Ontvanger ta wanta esaki i lo deskonté ku e debe di e papel di belasting definitivo. Ontvanger lo manda un karta ku ta spesifiká kiko a paga kaba basá riba e papel di belasting temporal i kon a deskonté for e papel di belasting definitivo 2014. Tin kaso ku e montante di e papel di belasting temporal i e montante di papel di belasting definitivo ta igual. Den kaso ku ta asina no tin nada di paga.
Lei ta stipulá tambe ku tur propiedat imobil sin konstrukshon di un balor menos ku ANG 25.000 i tur propiedat imobil ku un konstrukshon di un balor menos ku ANG 75.000 ta eksonerá di OZB. Pa esnan ku tin ku haña nan sèn bèk (restitutie), e pago bèk ta tuma lugar outomátikamente via di banko. Tuma nota ku e kuenta di banko mester ta registrá na Ontvanger. Inspectie lo kontinuá ku e proseso di destruí papel di belasting temporal OZB 2015, 2016 i 2017 i pone papel di belasting definitivo pa e añanan aki na kuminsamentu di 2019.
