Publiká riba 25 Òktober 2024
WILLEMSTAD – Durante e bishita ofishal di Presidente di Sürnam, Su Ekselensia Chandrikapersad Santokhi, na Kòrsou dia 22 i 23 di òktober 2024, promé dama Mellisa Santokhi-Seenacherry a hunga un ròl prominente a traves di su esfuerso pa promové salú mental i desaroyo personal. Komo abogado i defensor dediká, e tin hopi tempu kaba ta pidi atenshon pa bienestar di hóbbennan i ta usa su plataforma komo Promé Dama awor pa logra un impakto duradero den e área akí pa generashonnan ku ta bini.
Dia 22 di òktober, el a bishitá skol avansá Amador Nita, kaminda el a papia ku un grupo di 40 alumno tokante un problema ku mas i mas ta kresiendo serka hóbennan: adikshon na telefòn selular. Promé dama a papia habrí tokante e adikshon akí i su influensha riba salú mental di hóbennan, Tambe el a duna konseho prátiko kon pa haña balansa i logra dominá e adikshon.
Minister di Enseñansa, Siensia, Kultura i Deporte, señor Sithree van Heydoorn, a ekspresá su apresio pa e interes di e promé dama den hóbennan. “Bo esfuerso pa edukashon, komunidat i hubentut ta mustra ku liderazgo no solamente mester keda na palabra, pero, mas importante, tambe enserá akshon,” Minister a deklará. El a papia tambe ku e alumnonan i a motivá nan pa siña di e promé dama: “Probechá awor pa siña di e hendenan rondó di bo, pa hasi pregunta i pa soña. Wak ehèmpel di lidernan manera promé dama ku ta mustra ku tur kos ta posibel ku dedikashon i esfuerso nesesario.”
Dia 23 di òktober, promé dama a kontinuá su programa ku un seshon di ‘Salú Mental’ huntu ku algun figura prominente for di e sektor di edukashon i kuido di salú na Kòrsou. Durante e seshon akí, el a kompartí su konosementu i eksperiensia tokante importansia di salú mental i a hasi un yamada pa un esfuerso kompartí pa un futuro mas salú pa e hubentut.
E bishita ofishal di e delegashon di Sürnam, inkluso Minister di Asuntunan Eksterior, Komèrsio Internashonal i Kolaborashonnan Internashonal (BIBIS), Su Ekselensia Albert Ramdin, a keda karakterisá pa diálogonan fruktífero entre e dos paisnan. Aktividatnan di e promé dama durante e bishita akí ta suprayá importansia di kolaborashon riba tereno di bienestar mental, i pa fortalesé e lasonan entre Sürnam i Kòrsou.
