Publiká riba 28 Febrüari 2024
WILLEMSTAD – Servisio di Seguridat Nashonal Kòrsou (VDC) huntu ku e Direktorado di Kontrol di Riesgo i Maneho pa Kalamidat (DRR) a organisá riba 27 di febrüari e promé kongreso tokante seguridat nashonal di Kòrsou. Seguridat nashonal pero tambe seguridat den Reino ta di importansia i tin un impakto direkto/indirekto riba kada persona den nos komunidat. Alabes ta importante pa realisá ku salbaguardiá seguridat nashonal ta un aspekto esensial pa por biba liber i den trankilidat den un komunidat.
Pa por salbaguardiá seguridat nashonal di un i tur, mester tene kuenta ku riesgonan na diferente nivel i di e diferente aspektonan ku por tin un impakto riba e seguridat nashonal di bo pais. Banda di e riesgonan tambe mester tene kuenta ku medidanan di prekoushon ku ta ser/ o por ser tumá pa asina salbaguardiá nos seguridat nashonal.
Den e afan pa sigui alsa e nivel di konsientisashon i alabes seguridat nashonal, VDC i DRR a organisá e kongreso ariba menshoná pa asina duna mas informashon i konsientisá un i tur tokante e nivel di seguridat nashonal ku nos tin na Kòrsou i kiko tur por ta di influensia riba esaki (p.e. pa kambio di klima, ‘cyber’, menasanan ‘geo’ polítiko, preshon negativo den komunidat, dependensia di sierto sektor vital i ekonomia). E kongreso a fungi alabes pa inventarisá kon resiliente komunidat ta pa ku e diferente riesgonan ku por forma un situashon di atenshon pa ku nos seguridat nashonal. Pero tambe pa inventarisá e diferente plannan i medidanan di prekoushon ku ta ser usá pa asina por salbaguardiá, i kaminda ta nesesario elevá, seguridat nashonal di Kòrsou.
Durante e kongreso a para ketu riba e ‘Veiligheidsstrategie voor het Koninkrijk der Nederlanden 2023-2029’ ku ta un strategia ku tin komo enfoke sentral salbaguardiá seguridat (nashonal) di Reino. E strategia ta enfoká riba tres meta sentral i diesdos liña di akshon ku lo yuda kontribuí pa hasi Reino Hulandes mas resiliente pero alabes hisa e nivel di seguridat nashonal di kada pais den Reino. Por logra e meta akí solamente si gobièrnu di kada pais den Reino huntu ku komunidat, sektor empresarial i organisashonnan sosial traha huntu. Palabrashon den Reino ta ku lo bai implementá e ‘veiligheidsstrategie’ i e promé paso pa ku esaki tabata e kongreso nashonal di seguridat.
Netamente pa yega na e meta komun di manera deskribí den e ‘veiligheidsstrategie’, a tene un seshon ku diferente ‘stakeholders’ (no) gubernamental manera servisio meteorológiko, brantwer, polis, Flow, Aqualectra i Curoil pa asina nan por duna nan aporte for di nan área di trabou i ekspertisio tokante e tema seguridat nashonal. Riba e dia en kuestion tambe tabatin un seshon pa públiko kaminda komunidat por a duna un aporte na informá i konsientisá otro di e riesgonan. Alabesa para ketu na e diferente solushonnan en konekshon ku seguridat nashonal ku meta final pa alsa esaki.
