Publiká riba 05 Òktober 2017
WILLEMSTAD — Promé Minister Eugene Rhuggenaath a kompletá un bishita eksitoso di 18 sèptèmber pa 21 di sèptèmber último na New York pa e apertura di e 72 Asamblea General. E Asamblea General ta un konvenio di praktikamente tur pais na mundu ku ta tuma lugá tur aña i ta ofresé un oportunidat úniko pa interkambiá, buska kolaborashon i estrechá laso ku diferente pais. Kòrsou tambe a forma parti di e delegashon di Reino huntu ku Minister di Asuntunan di eksterior Koenders, promé Minister di Hulanda Sr. Rutte, su Mahestat Reina Máxima i e Ministernan plenipotenisiario di Aruba i Kòrsou.
Durante su bishita promé Minister Rhuggenaath a hasi uso di e posibilidat pa topa ku yunan di Kòrsou ku ta biba na New York. Durante un enkuentroameno djaluna anochi, ela enfatisá ku e gobièrnu aki ta habri pa nan ideanan i kier embolbí yunan di Kòrsou na unda ku nan ta na mundu den desaroyo di nos isla.
Djamars dia 19 di sèptèmber, promé minister a asistí na un enkuentro ku hefenan di estado organisá pa e Konseho di Seguridat di Nashonnan Uní. Despues e tabata presente durante e apertura di e debate general i tambe e mes a hasi apertura na un seshon riba e tópiko di implementashon di e metanan sostenibel riba islanan chikí den desaroyo, asina yamá SIDS. Islanan den desaroyo ta vulnerabel paso nan ta chikitu i tin sirkumstansianan sosial i ekológiko spesífiko. E situashon den karibe despues di orkan Irma i José i esfuersonan pa yuda konstruí e islanan na un manera aun mas resistente kontra kambio di klima tambe a haña atenshon durante e asamblea general i durante un reunion organisá pa Reino Hulandes, Fransia i CARICOM. Riba invitashon di promé minister di Bangladesh i presidente di Chile, promé minister Rhuggenaath a forma parti di 2 panel; unu riba e tópiko di monitoriá metanan sostenibel pa desaroyo duradero i otro riba kombatimentu di pobresa na un forma multidimensional, algu ku ta un prioridat tambe pa e gabinete aki i ta sentral den e programa di urgensia i di gobernashon.
Tambe promé minister a tene diferente kombersashon bilateral ku paisnan den region ku ta di interes pa nos isla. Tabatin kombersashon ku Panama, Trinidad & Tobago, Barbados, Anguilla i Venezuela. Durante e enkuentro ku presidente di Panama a kombersá riba posibilidatnan pa amplia aktividatnan ekonómiko. Ku e minister di Venezuela a kombersá riba e negosiashonnan en kuanto kontinuashon di nos refineria i a hasi palabrashon pa un bishita di un delegashon di Venezuela pronto na Kòrsou.
Por wak bèk riba un bishita fruktífero kaminda a krea i fortifiká konekshonnan pa mas kolaborashon internashonal i interkambio di konosementu na bienestar di Kòrsou. Den kurso di e siman aki lo entregá un rapòrt di e biahe na parlamento.
