Promé Minister E. Rhuggenaath ta bishitá dianan di Forsa Aéreo 2019 - Informashon tokante Gobièrnu di Kòrsou Bo opinion

Notisia

Promé Minister E. Rhuggenaath ta bishitá dianan di Forsa Aéreo 2019

Geplaatst op 17 June 2019 dor di Ministerio Asuntunan General i Promé Minister

DEN HAAG -Durante di su bishita na Hulanda Promé-Minister E. Rhuggenaath a partisipá na e dianan di Forsa Aéreo di e Forsa Aéreo Real riba 15 yüni 2019. Huntu ku Sekretario di Estado di Asuntunan Interior i Relashonnan den Reino Raymond Knops, el a bishitá e base aéreo Volkel (Noord-Brabant).

240 mil hende a bishitá e dianan di Forsa Aéreo riba 14 i 15 yüni na base aéreo Volkel. E tema di e dianan akí tabata ‘Nos ta e Forsa Aéreo’. A tene e evento akí promé biaha atrobe den tres aña. E bishitantenan na e base aéreo a haña splikashon tokante di e diferente avionnan; nan a mira show di avion i demonstrashon di avionnan Hulandes i di eksterior.

Interes
Kolonèl Olav Spanjer a risibí Promé-Minister Eugene Rhuggenaath i Sekretario di Estado Raymond Knops na nan yegada. Nan a asistí e apertura ofisial di e dianan di Forsa Aéreo. E tabata un bon oportunidat pa Promé Minister Rhuggenaath pa bishitá e avionnan di Hulanda i haña splikashon di e aplikashon di e avionnan i tambe pa haña un idea di e manera di aktua di e forsa aéreo. Promé-minister Rhuggenaath a sigui e splikashon ku interes i e la atmirá entre otro e LockheedMartin F-35 Lightning ll nobo.

F-35
E F-35 ta bira e susesor di e F-16 i e tabata e punta kulminante pa hopi bishitante. Dos F-35 a bula for di Merka spesial pa e dianan di Forsa Aéreo. E Airbus A330MRTT-avion petrolero nobo, ainda den e kolónan nobo di e fabrikante, a haña hopi interes. E avion multifunshonal aki ta tènk den laira i por us’é entre otro komo un avion di transporte. Otro aña ta usa e promé avion na Hulanda.

Promé Minister Rhuggenaath a haña un rekorido i splikashon amplio tokante di e funshon di e Airbus A330 MRTT. E tabata impreshoná pa e dianan di Forsa Aéreo ku a ofresé un bon idea di e forsa aéreo di Reino.

Ministerio konserní