Publiká riba 18 Òktober 2026
Willemstad – Promé Minister Gilmar Pisas a habri ofisialmente e di 24 Asamblea General di Asosiashon Karibense di Komiténan Olímpiko Nashonal (Caribbean Association of National Olympic Committees – CANOC), riba djadumingu 18 di òktober, na Renaissance Wind Creek Curaçao Resort. E enkuentro a trese huntu mas ku shen delegado i atministradónan deportivo di Karibe. Ku representantenan di organisashonnan deportivo di entre otro Latino Amérika, Asia i Afrika, nan tur a papia tokante e futuro di deporte den e region.
Den su diskurso di apertura, Promé Minister Pisas a enfatisá ku e grandesa di Karibe no ta determiná pa e tamaño di su paisnan, sino pa e talento, determinashon i spiritu di su hendenan. E logronan di atletanan karibense ta demostrá kiko paisnan chikitu por logra ora duna talento oportunidat pa desaroyá. Tambe el a menshoná atletanan di Kòrsou, entre otro e landadó Enith Brigitha, e kampionnan di Little League di 2004 i 2026 i e Blue Wave.
Segun Promé Minister, invertí den deporte ta bai mas leu ku medaya i persigui un lugá riba podio. Deporte ta siña hóben disiplina, koperashon i konfiansa propio, ta habri porta pa enseñansa i oportunidatnan internashonal i ta yuda prevení vulnerabilidat sosial. El a enfatisá e importansia di entrenamentu apropiá pa entrenadónan, atministrashon profeshonal di deporte i e guia ku atletanan tin mester pa desaroyá nan talento. Ademas, el a elogiá CANOC pa su invershonnan den e área akí, inkluyendo kolaborashon ku The University of the West Indies.
Promé Minister Pisas a invitá organisashonnan deportivo pa skohe Kòrsou henter aña pa nan kampamentunan di entrenamentu, kampeonatonan regional, kursonan di entrenamentu i tayernan. El a indiká ku Kòrsou tin komo meta pa sigui desaroyá su mes komo un lugá di enkuentro i konekshon pa deporte den Karibe. El a terminá ku un yamada pa traha huntu pa konstruí un sistema deportivo sostenibel ku ta ofresé oportunidat na atletanan di tur isla, pa asina mas talento karibense por yega na e podionan mas haltu na mundu.
Promé Minister Gilmar Pisas: “Ora nos ta invertí den deporte, nos no ta djis persigui un lugá riba un podio. Nos ta konstruyendo resiliensia sosial. Tur mucha riba un pista di atletismo, riba un vèlt òf den un pisina ta siña disiplina, traha den ekipo i konfiansa propio. Kòrsou semper tabata un lugá kaminda diferente mundu ta topa. Esei tambe ta e ròl ku nos ke tin pa deporte den Karibe: un lugá di enkuentro pa deporte, un brùg, un ‘hub’.”