Publiká riba 17 Novèmber 2026
Willemstad – Promé Minister Gilmar Pisas i Minister Plenipotensiario Sidney Justiana ta representá Kòrsou na e promé ‘Kingdom Summit’, ku ta tuma lugá djamars 17 i djárason 18 di novèmber 2026 na Sint Maarten. E reunion na nivel haltu akí ta trese e gobièrnunan di Kòrsou, Aruba, Sint Maarten i Hulanda huntu ku e meta pa fortalesé e kolaborashon entre e kuater paisnan den Reino Hulandes.
Durante di e dos dianan, e gobièrnunan ta interkambiá informashon i eksperensia tokante retonan ku nan tin en komun. Algun di e temanan riba agènda ta entre otro seguridat, efektonan di kambio di klima riba e islanan den Reino i desaroyo finansiero i ekonómiko di e paisnan. Kòrsou ta trese tambe e lucha kontra pobresa na mesa komo un prioridat nashonal.
Pa Promé Minister Pisas, e enkuentro ta un oportunidat pa presentá e perspektiva di Kòrsou i eksplorá, huntu ku e otro paisnan, riba kua tereno nan lo por apoyá otro. Durante di e diálogonan akí, rèspèt pa identidat, outonomia i interesnan di kada pais lo ta e punto di salida pa kolaborashon.
