Publiká riba 11 Mart 2022
Willemstad- Dianan 9 i 10 di mart último tabata e promé dos (2) dianan di un bishita di trabou ofisial ku Promé Minister Gilmar Pisas a hasi na Chile. E bishita di trabou akí ta tuma lugá den representashon di Reino Hulandes (Hulanda, Aruba, Kòrsou i St Maarten).
Durante e promé dos dianan akí, Minister Pisas ya tabatin diferente enkuentro importante entre otro ku tantu e Promé Minister, Minister di Finansa i Minister di Relashon ku Eksterior di Chile.
Un di e enkuentronan ku a tuma lugá djárason, 9 di mart último, tabata un reunion huntu ku Embahador di Reino Hulandes i tambe representantenan di Alto Komisario di Nashonnan Uní pa Refugiadonan (UNHCR) i e Organisashon Internashonal pa Migrashon (OIM). Durante e reunion akí, a trata temanan manera e situashon di migrantenan den Reino, mobilidat humano i e nesesidat pa traha huntu riba un solushon pa posibel problemanan ku e paisnan ta konfrontá internamente pa motibu di e situashon di migrashon.
Embahador Hulandes sra. Carmen Gonsalves a risibí Promé Minister Pisas tambe i huntu nan tabatin un enkuentro ku e Minister di Asuntunan Eksterior di Costa Rica, sr. Rodolfo Solano. Den e renion a papia entre otro riba e deseo i intenshon di ámbos pais pa uni forsa i traha huntu riba temanan di interes mutuo. Pronto lo bolbe reuní pa profundisá riba temanan ku ya por keda ehekutá i sigui elaborá riba temanan nobo.
E intenshon ku a bini dilanti durante e promé dos dianan akí tabata tambe e importansia pa mantené lasonan estrecho ku Costa Rica i Chile. Djabièrnè 11 di mart sr. Gabriel Boric i tambe sra. Antonia Urrejola Noguera ofisialmente a asumí respektivamente e kargonan di Promé Minister i Minister di Relashon ku Eksterior di Chile. E kambio di presidensia di Chile ta un okashon importante kaminda no únikamente nos Promé Minister ta representá nos islanan sino tambe Hulanda.
E bishita di trabou na Chile ta kanando fruktífero i Minister Pisas ta spera di por yega na diferente akuerdo importante na nòmber di Reino Hulandes.
