Publiká riba 25 Aprel 2019
WILLEMSTAD – Riba djarason 24 di aprel shete miembro di Kongreso Merikano a hasi un bishita históriko na Kòrsou. Tabata promé biaha den 22 aña ku miembronan di Kongreso Merikano a bishitá Kòrsou. Durante di e bishita akí e miembronan a kombersá ku Promé Minister Rhuggenaath, Minister di Hustisia Sr. Girigorie, Parlamento i diferente representante di Gobièrnu.
Den tur kombersashon e krísis ekonómiko, polítiko i humanitario na Venezuela i e konsekuensianan drástiko ku e situashon insigur persistente tin pa Kòrsou tabata sentral.
Promé Minister Rhuggenaath i Minister Girigorie a diskutí diferente aspekto, entre otro e problema di migrashon, hùp humanitario i e situashon rondó di refineria. A para ketu na e konsekuensianan ku e sanshonnan Merikano kontra Venezuela i PDVSA tin pa e refineria na Kòrsou i pa ekonomia di Kòrsou na e momentunan akí. A papia ku miembronan di Kongreso tokante kon nan por promové riba término korto realisashon di dispensashon di e sanshonnan pa Kòrsou.
Ademas, a indiká posibel temanan di koperashon entre e Estádonan di Merka ku nan ta representá i ku Kòrsou. Tambe a tene un alegato pa stimulá invershon Merikano na Kòrsou.
Promé Minister Rhuggenaath a partisipá ku e tabata kontentu di por a risibí e mimebronan, pa asina establesé e elementonan básiko pa un relashon mas sólido ku Merka. Ku e bishita akí Gobièrnu ta spera di sigui intensifiká e relashonnan di koperashon i invershon ku Merka.
