Publiká riba 06 Ougùstùs 2019
WILLEMSTAD – Djabièrnè 26 di yüli 2019, Promé Minister Eugene Rhuggenaath i Minister Zita Jesus-Leito di Tráfiko, Transporte i Planifikashon Urbano a bishitá e bario di Kortijn pa tuma nota di desaroyo di e proyekto ku Gobièrnu di Kòrsou ta ehekutando ku finansiamentu di Union Oropeo. E dos Ministernan a topa ku e tim di eksperto i kontratista i tambe ku habitantenan ku ta satisfecho ku e proyekto ta kasi kla.
Manera konosí Union Oropeo, pa medio di fondonan di koperashon di desaroyo bou di e di 10 fondo (EDF 10th), a destiná un suma di € 11.250.000 pa Kòrsou. Di e suma aki, un montante di € 8.701.670 a ser destiná pa trabounan infrastruktural urbano den 4 bario di Kòrsou, kual ta; Kortijn, Nieuw Nederland, Sapaté Blok H i Tera Cora. Gabinete Rhuggenaath a duna inisio na e proyekto di Kortijn 27 di novèmber 2017.
Durante su rekorido Promé Minister Rhuggenaath a indiká ku ta un plaser di mira e transformashon di e bario ku sigur lo kontribuí na hisa kalidat di bida den e área. Promé Minister Rhuggenaath ta kontentu ku e trabounan lo kaba mas trempan ku ta planiá i ta aploudí e tim di eksperto konhuntamente ku e Ministerionan di Asuntunan General i di Tráfiko, Transporte i Planifikashon Urbano ku ta guiando e proyekto éksitoso aki.
A start ku e trabounan di infrastruktura ofisialmente dia 5 di aprel 2018 den bario di Kortijn. A kita e kapa di asfalt i pone klenku rònt e bario. Mei mei di e bario, esta Kurá di Shon Fil, tambe a traha un vèlt multifunshonal. Lo bini iluminashon públiko (LED verlichting), banki i tambe un ‘outdoor gym’ pa habitantenan por hasi ehersisio físiko. A buta un parke pa habitantenan por sinta rekreá, un parke pa muchanan hunga i ta bai planta palu pa krea mas sombra den e área. Na final den Kortijnweg lo remplasá e kapa bieuw di asfalt. E trabounan den Kortijnweg ta den fase final di ehekushon. Na e momentunan aki Aqualectra ta trahando pa pasa un kabel di voltahe haltu pa hòspital nobo i dor di esaki e trabounan ta dura mas ku e 2 dos simannan planiá. Ku tur probabilidat lo asfaltá Kortijnweg promé ku dia 15 di ougùstùs promé ku skolnan habri.
E trabounan pa hinter e bario ta kanando sigun e plan aprobá i ta premirá ku trabounan ta finalisá fin di sèptèmber 2019 en bes di fin di novèmber 2019 manera anteriormente tabata planiá. Dor ku a traha efisiente e trabounan ta kaba mas trempan di moda ku lo tin ménos molèster pa habitantenan i usuarionan. E kontratista MNO Vervat Curaçao N.V. ta enkargá ku ehekushon di e trabounan na Kortijn.
E trabounan den e bario di Nieuw Nederland tambe ta den fase final i ta pendiente di aprobashon di Union Oropeo pa algun trabou adishonal di kloaka den Oranjestraat, algun klenku den Penstraat Zuid i Walcherenstraat. Trabounan na Tera Cora i Sapaté Blok H tambe ta riba skema. Na Tera Cora ta kreando entre otro infrastruktura pa bibienda i na Sapaté Blok H lo bini un sentro multifunshonal. Gabinete Rhuggenaath ta komprometí pa kaba ku e trabounan segun plan.
E Ministernan ku e tim a haña un bon chèns pa papia personalmente ku e habitantenan den bario i asina krea un bon bista di e desaroyonan den Kortijn. Hasta nan a dal un dushi Li pa freska e kurpa na kaminda.
Riba e siguiente potrètnan (athunto un total di 13 potrèt) por mira Promé Minster Rhuggenaath ku Minister Jesus-Leito riba e ruta huntu ku e tim i Presidente di Komishon di bario Kura’i Shon Fil i bisendario, Sr. Mike Brissett.
