Publiká riba 08 Yüli 2020
WILLEMSTAD – Riba djárason 8 di yüli 2020, Promé Minister Rhuggenaath lo biaha pa Hulanda en konekshon ku e reunion djabièrnè 10 di yüli benidero di Konseho di Minister di Reino. Durante e reunion aki lo trata e pakete di kondishonnan nobo i ekstensivo pa por bini na remarke pa yudansa finansiero, ku mester yuda Kòrsou superá e krísis di COVID-19 i pa logra realisá reformanan struktural riba término largu.
Mirando e akontesimentunan di último tempu, Promé Minister Rhuggenaath ta konsiderá e biahe aki di sumo importansia pa por sigui deliberá tokante solushonnan duradero na bienestar di pueblo di Kòrsou.
E kombersashonnan ku Promé Minister Rhuggenaath lo bai hiba na Hulanda, lo ta den kuadro di e pensamentu ku huntu, komo paisnan den Reino, mester por yega na akuerdonan ku na promé lugá ta realístiko i realmente ta aportá na desaroyo positivo di Kòrsou, pero alabes ta sigui fortifiká e relashon balioso entre ambos pais.
Promé Minister Rhuggenaath lo regresá Kòrsou riba djadumingu 12 di yüli 2020. Durante su ousensia Minister Steven Martina lo fungi komo Vise Promé Minister.
