Publiká riba 07 Aprel 2025
Willemstad – Promé Minister sr. Gilmar Pisas a tene un reunion di despedida ku Kònsùl General di China sr. Li Yigang dia 4 di aprel 2025.
Kònsùl General Li Yigang tabata presente huntu ku su kasa sra. Wang Wenqiu, Kònsùl Wang Fanfu, Vice Kònsùl Wang Haokun i srta. Sophia Tang. Meta di e bishita aki tabata pa Kònsùl General Li Yigang por a tene su último reunion, komo Kònsùl General di China, ku Promé Minister sr. Gilmar Pisas i alabes felisitá Promé Minister sr. Pisas pa ku e resultado di elekshon 2025. Durante di e bishita aki a tuma e oportunidat pa elaborá kòrtiku riba e desishon ku a keda tuma na Merka tokante e tarifanan imponé na paisnan rònt mundo, e konsekuensia pa ku e desishon aki i kiko por ta e alternativanan i òf posishon ku por tuma al respekto.
Kònsùl General Li Yigang su periodo komo Kònsùl General di China ta yegando su final aki na Kòrsou, e lo bandoná Kòrsou dia 16 di aprel 2025 i su remplasante, por lo pronto te dia e Kònsùl General nobo yega, lo ta Kònsùl Wang Fanfu.
Promé Minister sr. Pisas a gradisí Kònsùl General Li Yigang pa tur loke e la nifiká i hasi pa Kòrsou i komo muestra di apresio a duna Kònsùl General Li Yigang un bunita rekuerdo pa e keda kòrda riba Kòrsou. Kònsùl General Li Yigang na su turno a gradisí Promé Minister sr. Pisas pa e sosten ku e la risibí di parti Gobièrnu di Kòrsou i e pueblo di Kòrsou. Kònsùl General Li Yigang a ekspresá tambe gratitut pa ku e forma ku ta akseptá i sostené e komunidat Chines na Kòrsou.
E kombersashon tabata unu hopi ameno i fruktífero.
