Publiká riba 15 Yüni 2018
Promé Minister a duna sanger riba Dia Mundial pa Dunadó di Sanger
Willemstad – Ku su manga di kamisa los, promé minister Rhuggenaath a rèk saka su man pa e zùster por prek un angua i e duna mei liter di sanger. Promé minister a hasi esaki djaweps na Banko di sanger, p’e duna un aporte na selebrashon di Dia Mundial pa Dunadó di Sanger.
Pa hopi aña kaba promé minister Rhuggenaath ta duna di sanger. Ku e donashon riba e dia mundial pa dunadónan, e kier enkurashá un i tur pa sigui su ehèmpel. ‘Duna sanger i skapa un bida!’, ta un di e lemanan di e aña aki di Banko di sanger ku ta sòru pa tin sanger durante operashonnan na Kòrsou, Boneiru i Sint Maarten. De bes en kuando tin ku manda sanger tambe Aruba.
Rilèks sinta promé minister a pasa dor di e promé chèk di preshon i di heru pa sigui den e sala prinsipal na unda ta duna sanger. Hinter e proseso no a dura mas ku mei ora. Den e mei ora ei promé minister Rhuggenaath a haña un bon splikashon unda Banko di sanger ta para aworakí. Direktor di banko di sanger, profèser doktor Ashley Duits a para banda di e kama, kompañá promé minister Rhuggenaath durante su donashon. Mientrastantu ku e sanger tabata kore for di ader di promé minister su man bai den e saku di kolektá, doktor Duits a konta señor Rhuggenaath kuantu atmirashon tin for di eksterior pa e Banko di sanger di Kòrsou. For di Guyana a pidi doktor Duits pa yuda organisá e Banko di sanger einan. Tambe a hasi un petishon pa for di Kòrsou yuda ku e Banko di sanger na Trinidad & Tobago. Resien a mustra na Boneiru ku aworakí ta usando e téknikanan mas moderno na Kòrsou pa prosesá e sanger kolektá.
Promé minister Rhuggenaath a keda impreshoná ku e logronan. E a deklará ku Banko di sanger ta un di e institutonan ku Kòrsou por ta orguyoso di dje. Djasabra awor e Banko di sanger ta tene un dia habri.
