Promé Minister: tur reto mester atendé ku urgensia, diligente i trankil - Informashon tokante Gobièrnu di Kòrsou Bo opinion

Notisia

Promé Minister: tur reto mester atendé ku urgensia, diligente i trankil

Geplaatst op 12 December 2019 dor di Ministerio Asuntunan General i Promé Minister

WILLEMSTAD – Durante di un rueda di prensa ekstraordinario djaweps 12 di desèmber 2019, Promé Minister Rhuggenaath a dirihí palabra na komunidat komo reakshon riba akontesimentunan di último siman relashoná ku Girobank. Gobièrnu di Korsou, konsiente di e impakto riba komunidat i e inseguridat i angustia ku esaki ta trese, ta dediká na atende esaki huntu ku Banko Sentral ku urgensia i di un forma diligente ku bienestar di komunidat na mente.

Ya Konseho di Minister a bin ta trata e tópiko den último simannan i for di djamars a sinta ku diferente stakeholders pa resolvé un ke otro riba término kòrtiku. Konseho di Minister a lanta un komishon di eksperto pa konsehá riba sektor bankario, ku ta inkluí e kaso di Girobank. Apesar ku Gobièrnu i komunidat di Kòrsou mester enfrentá diferente reto pareu, ta keda boga ku ta di gran importansia pa netamente aworaki hinter pais mantené trankilidat den e tempunan difísil i sigui wak padilanti pa yega na e mihó solushonnan pa Kòrsou.

Debí na diferente suseso den fin di siman, e desaroyonan rondo di Girobank a aselerá, i e moratorio konvoká pa Banko Sentral ta un akshon konforme normanan internashonal pa hasi posibel ku sigur 93% di e kreditornan, ku tur probabilidat, lo por dispone bèk di nan sèn mañan, esta djabièrne 13 di desèmber, te na un montante di 10 mil florin di loke nan tin depositá na Girobank. Manera anunsiá dor di Banko Sentral tur montante nobo ku subi kuenta di un kliente na Girobank tambe lo keda disponibel. Mientras tantu, Gobièrnu ta fasilitá pa atendé ku e kreditornan ku tin montantenen riba 10 mil konfiá na e banko, anto atendé na un forma debido ku kompania i entidatnan ku tin deber na terser, por ehèmpel na empleadonan.

Promé Minister a enfatisá ku vários di nos retonan aktual ta eksihí tempu pa atendé korektamente i pues ta hasié imposibel pa por solushoná tur kos den un tiru. Gobièrnu su kompromiso ta pa hasi tur loke tin na su disposishon, karga su responsabilidat i sigui atendé esaki tambe di forma diligente i urgente di dia i anochi. El a remarká ku ningun entidat ta para riba nan mes den un komunidat, ni niun persona riba su mes, p’esei ta hasi un apelashon mas riba kompromiso di komunidat pa keda trankil i sostené otro i pa riba retnan sosial i di komunikashon no krea pániko adishonal.

Ministerio konserní