Publiká riba 09 Febrüari 2023
WILLEMSTAD – Durante di e reunion di Konseho di Minister dia 8 di febrüari 2023, Gobièrnu di Kòrsou a tuma desishon pa proponé Venezuela un fecha pa habri frontera entre Venezuela i Kòrsou.
Konseho di Minister a tuma e desishon pa proponé Venezuela pa e reapertura di frontera pa ku e parti marítimo i esun aéreo tuma lugá djaluna dia 3 di aprel 2023.
Den e próksimo periodo lo finalisá huntu ku Venezuela e último detaye i kondishonnan pa por yega na e reapertura di frontera dia 3 di aprel 2023.
Gobièrnu di Kòrsou lo sigui informá komunidat riba e proseso akí i ta keda pendiente pa Venezuela bai di akuerdo ku e fecha ku Gobièrnu di Kòrsou a proponé.
