Notisia

Baha insiguridat i subi solidaridat

PROPOSISHON PA PAKETE DI SOSTEN PA MANTENÉ KUPO DI TRABOU I AKTIVIDAT EMPRESARIAL

WILLEMSTAD — Gobièrnu di Kòrsou a risibí proposishon pa un Pakete di Sosten i un fondo di emergensia pa mitigá e efektonan sosial-ekonómiko i finansiero ku Kòrsou ta konfrontando a konsekuensia di COVID-19. E pakete ta rekomendashonnan di e ‘Commissie Noodfonds COVID-19’, ku gobièrnu a instalá dia 19 di mart último.

E komishon a duna su rekomendashon pa un Pakete di Sosten despues di a konsultá ku sektornan importante den nos komunidat i hasiendo kálkulonan ekstensivo i detayá. Sentral den esaki ta ku nos hendenan ta mantené nan trabou. E kosto total di e pakete ta Nafl. 765,5 mion pa kubri tres luna di sosten. 

Ta ferwaktu ku por introdusí e vários aspekto di e pakete den fase. Gobièrnu awor aki ta analisá i kalkulá kua parti di e pakete nos por implementá i paga riba nos propio forsa finansiero, i pa kua nos ta buska sosten via Reino, i posibel fondonan internashonal. Fin di otro siman lo tin mas klaridat riba e fondonan disponibel riba término kòrtiku. I despues ta sigui traha riba e fondo di emergensia pa término mediano i largu mas struktural, i e finansiamentu di dje. 

Basa riba solidaridat
Gobièrnu di Kòrsou a aserká Gobièrnu di Reino entretantu kaba pa sosten, mirando ku di un banda Cft a konsehá pa konsiderá e situashon ku Kòrsou t’ aden, pa motibu di e Covid-19, komo force majeur i ku di otro banda Konseho di Minister di Reino a deklará di tin e boluntat pa yuda.

Punto ta keda sí ku den e próksimo lunanan, konhuntamente nos mester dal pasonan konkreto i mester tene kuenta ku kada miembro di nos komunidat mester prepará pa hasi sakrifisio. Asina, basá riba solidaridat, nos ta logra enfrentá e reto grandi ku a presentá su mes, no solamente akinan, pero rònt mundu.

E pakete di Sosten

E Pakete di Sosten ku a añadí na e Pakete di Alivio ku Gobièrnu a introdusí anteriormente, ta konsistí di:

• 1. Pakete di emergensia pa sostené kompanianan pa mantené trahadó den servisio salariá
     Yudansa na dunadó di trabou pa kubrí mensualmente entre 20% pa 80% di e salario di su trahadónan, si su pèrdida estimá di entrada ta mas ku 25%. E kondishon ta ku mester mantené tur hende ku ta traha fiho (vaste dienst) na trabou.
  2. Sosten pa empresarionan individual
     Nafl. 1.335,- pa luna pa empresarionan chikitu i pa hendenan ku tin un negoshi sin empleado den servisio. Lo duna prioridat na sektornan gravemente afektá, manera transporte públiko, horeca, benta por menor, aviso i dibertishon (entertainment).
  3. Pago sosial pa esnan ku a pèrdè trabou
     Tur hende ku a pèrdè trabou for di 15 di mart último ta risibí un kompensashon di maksimal Nafl. 1.000,- pa luna.
  4. Pago sosial pa por wanta/sobrebibí/defendé kurpa
     Kompensashon di Nafl. 450,- pa luna pa hende ku ta kobra ònderstant; lo pèrmití nan kue djòp ora esei ta posibel atrobe.
  5. Sosten pa kompanianan mikro, chikí i mediano
     Fasilidat di krédito te ku un máksimo di Nafl. 100.000,00 ku kondishonnan adaptá, pa kubri gastunan fiho di empresarionan ku kompanianan mikro, chikí i mediano den sektornan gravemente afektá.
  6. Kompensashon na  organisashon- i hendenan ku ta duna sosten i kuido
     Kompensashon pa organisashon- i hendenan ku ta pèrkurá pa e.o. kuido di grandinan, hendenan desabilitá, famianan ku yu.

E ‘Commissie Noodfonds COVID-19’ lo sigui traha i organisá e ehekushon di e Pakete di Sosten, miéntras ku Gobièrnu ta atendé ku e fondonan lokalmente disponibel, i e petishonnan hasí na Gobièrnu di Hulanda.

MAS NOTISIA

Ministerio konserní: Desaroyo Sosial, Labor i Bienestar