Notisia

illemstad – Resientemente Stichting Gezingsvoogdij Instelling Curaçao (GVI) a tuma nota di informashon ku a bin dilanti den prensa i media sosial. GVI ta lamentá esaki. Pa motibu di privasidat di menor, GVI no ta duna informashon di kasonan pero si di nos prosedura di guia di famia.

Stichting GVI Curaçao ta un fundashon ku ta kai bou di Ministerio di Hustisia di Kòrsou. GVI ta un fundashon ku tin komo meta pa:

• Duna guia na menornan ku ta bou di vigilansia di hues di mucha (OTS/Onder toezichtstelling) i nan mayornan. 
• Vigilá bienestar di e mucha.
• Duna guia boluntario na menor i famia.
• Funshoná komo tutor, ora no tin tutor pa un menor.

Voogdijraad ta investigá tur keho di maltrato òf negligensia. Korte, hues di mucha, ta pone e menor bou di su vigilansia pa medio di un ‘beschikking’. Ora tin ‘beschikking’ di korte, GVI ta kuminsá ku su guia.

Muchanan, ku ta kore peliger den nan desaroyo (general òf un área spesífiko), i nan mayornan, ta kai bou di guia di profeshonalnan di GVI. E yudansa ku e fundashon ta duna na kasonan OTS ta obligatorio. Esaki ta enserá tambe ku den sierto kaso tin te asta e nesesidat pa saka menornan for di kas, pa protekshon. Esaki ta sosodé pa medio di un desishon di hues di mucha.

Den nos buki di lei, Kódigo Sivil buki 1 artíkulo 254-265, e lei di vigilansia di hues di mucha ta deskribí. Pa medio di instrukshon na mayor, e gezinsvoogd ta trata na yega na e bienestar deseá di e menor ku ta bou di vigilansia di hues di mucha.

Pa mas informashon tokante Stichting GVI por fabor bishitá nos wèpsait www.gvicuracao.org

MAS NOTISIA

Ministerio konserní: Hustisia