Publiká riba 22 Mart 2023
Willemstad- Minister di Desaroyo Ekonómiko, Ruisandro Cijntje, a duna instrukshon na International Trade Centre (ITC) pa fasilitá un strategia di eksportashon pa turismo médiko i ‘wellness’. For di aña pasá, MEO huntu ku stakeholdernan ya a kuminsá e trayekto pa implementashon di e Strategia Nashonal di Eksportashon di Kòrsou ku ta enfoká riba 6 sektor di servisio kual ta: Servisionan Finansiero internashonal, Servisionan Marítimo i Portuario, ICT, Industria Kreativo, Edukashon i Blue Bio Economy. Dor di añadí e di 7 strategia akí, esta esun di Turismo médiko i ‘wellness’, nos por bai stimulá ekonomia i diversifiká nos turismo di tal forma ku e kresementu por ta mas duradero. International Trade Centre ta un agensia di Nashonnan Uní i World Trade Organization ku a yuda tambe den desaroyo di e 6 strategianan anterior. Personanan interesá pa lesa tokante e 6 strategianan anterior, por lesa tokante esaki riba www.gobiernu.cw
Huntu ku stakeholdernan di sektor públiko i privá ta bai traha riba e strategia di eksportashon akí pa destapá e potensial ku Kòrsou tin pa ofresé den kuadro di servisionan riba tereno médiko i ‘wellness’ na bishitantenan di otro pais i asina generá mas divisa, kuponan di trabou, salarionan mas haltu i asina traha na bienestar general pa pueblo di Kòrsou. Den kuadro di esaki, ITC a hasi kaba un sondeo di tur loke a keda trahá den pasado i a papia ku diferente persona ku ta aktivo den e sektor. Minister Cijntje a instalá un tim ku integrantenan ku konosementu pa sostené e proseso i fungi komo un ‘think tank’ pa realisashon di e strategia. Sra. Eileen Isebia, profeshonal den kuido i tambe ‘wellnes tourism’ lo trèk e tim akí den estrecho kolaborashon ku MEO i Interntaional Trade Centre.
Dia 30 i 31 di mart próksimo, ITC lo fasilitá konsultanan huntu ku tur esnan aktivo den e área médiko i di ‘wellness’ i ku ta interesá pa partisipá. Pa partisipá na e dos sianan di konsulta akí, registrashon adelantá ta nesesario. Tin hopi empresa aktivo den e área akí na Kòrsou, i ta na su lugá ku nos ta strukturá i ofresé un pakete di servisio den e sektor akí ku por atraé mas bishitante konsiente i ku ta posishoná Kòrsou komo un destinashon di ‘wellness’. Tin tambe hopi empresario chikí ku ta traha produktonan natural i profeshonalnan ku ta ofresé tur sorto di tratamentu i guia ku ta bale la pena inventarisá kiko tin i ki potensial esaki ta representá. Lo tin retonan tambe ku mester keda solushoná, i ta dor di papia di nan i identifiká nan, por atendé ku esakinan. E konsultanan di 30 i 31 di mart próksimo ta fasilitá dor di ITC ta tuma lugá na Curaçao Marriott Beach Resort i lo ta dos dia kompletu durante kua lo traha riba un vishon pa e sektor, ta traha riba kua ophetivonan, ta identifiká retonan i problemanan i ta yega na solushonnan i un plan di akshon. E ta un proseso inklusivo i ta tur presente lo yuda identifiká huntu kua ta bira e produktonan òf servisionan, e práktikanan i e tipo di profeshonalnan ku tin mas chèns pa keda desaroyá ku éksito den e sektor akí.
Tur hende aktivo den sektor médiko i di ‘wellness’ ku ta interesá pa partisipá na e dos dianan di konsulta dianan 30 i 31 di mart próksimo, por tuma kontakto ku MEO via curexport@gobiernu.cw pa asina risibí e lenk di registrashon òf bishitá MEO su página di Facebook òf Instragram kaminda tambe e lenk ta disponibel. Si bo sa di personanan ku por ta interesá den partisipá na e konsultanan akí, konta nan di e seshonnan di informashon i inspirá nan pa registrá.
