Notisia

Minister Sithree van Heydoorn i Minister Ornelio Martina ta firma protokòl  pa interkambiá informashon relashoná ku digitalisashon den enseñansa.

Willemstad – Den kuadro di e trayekto di Digitalisashon di enseñansa, Minister di Enseñansa, Siensia, Kultura i Deporte (ESKD) sr. Sithree van Heydoorn i Minister di maneho di Gobernashon, Planifikashon i Servisio na Públiko (GPSP) sr. Ornelio Martina ta firma protokòl di interkambio di informashon. E protokòl aki ta speshalmente pa e trayekto di digitalisashon di enseñansa. E dos ministerionan ta bai traha huntu i interkambiá datos pa asina traha mas efisiente i di forma moderno pa ku monitoreo i guia den enseñansa via di e kanal elektróniko.

Ministerio di ESKD tin komo tarea konforme e kuadro hurídiko; e ordenansanan di finansiamentu di enseñansa i e lei di enseñansa di fundeshi pa finansiá i monitoriá enseñansa. Relashoná ku esaki Ministerio di ESKD a desaroyá un aplikashon digital (Centraal Landelijk Onderwijs Applicatie-CLOA) pa sentralisá tur informashon pa por tin datos i informashon den un sistema kaminda Gobièrnu tin tur autorisashon. Pa un mihó sinkronisashon Ministerio di ESKD a aserká Ministerio di GPSP pa traha huntu i sinkronisá e informashonnan. Asina Ministerio di ESKD ta haña akseso na informashon personal pa por guiá i monitoriá e sistema edukashonal mas efisiente. Alabes esaki ta laga e ministerio di ESKD traha mas dirigí huntu ku tur su ‘stakeholder’ ora nan tin datos verídiko i korekto. Naturalmente a tene kuenta ku asektonan di seguridat, privasidat i supervishon pa asina salbaguardiá e datosnan.

E dos ministernan sr. S. van Heydoorn i sr. O.Martina a indiká ku e protokòl aki ta forma parti di e trayekto di digitalisahon i su meta ta pa hisa e kalidat i pone nos sistema administrativo riba un nivel moderno i efisiente. Di e forma aki nan ta sigui traha na bienestar di komunidat di Kòrsou i konforme e era moderno di digitalisahon.

Minister di ESKD sr. Sithree van Heydoorn ta informá ku den transkurso di e aña aki ta bin mas aktividat relashoná ku digitalisashon ku lo keda presentá na komunidat.

—

KOMUNIKASHON

**riba e potrètnan por tuma nota na momentu ku Minister S. Van Heydoorn i Minister O. Martina ta firma e protokòl den presensia di sra. S. Saab (Presidente di e komishon di digitalisashon), Sra. R. Haddocks (Direktor suplente di Asuntunan Públiko) i Sr. Z. Narvaez (Kolaborador di Kalidat di Asuntunan Públiko).