Publiká riba 13 Desèmber 2023
Willemstad – Minister di Tráfiko, Transporte i Planifikashon Urbano (VVRP) sr Charles Cooper ta informá e protokòl di koperashon entre Domeinbeheer (UO) i servisio pa Planifikashon Urbano (ROP)
Minister Charles Cooper a firmá un akuerdo ku Domeinbeheer (UO) pa oumentá e produkshon di e organisashon, inkluso den e proseso di duna tereno ”erfpacht” pa bibienda. E instrumento pa realisá e oumento aki di produkshon ta un “Voorschotnota beleid.”
Un kondishon esensial pa e implementashon éksitoso di e “voorschotnota beleid” ta ku Domeinbeheer ta haña asesoramentu di servisio pa Planifikashon Urbano (ROP) riba aspekto di planifikashon/desaroyo urbano. Sinembargo, debí na defisiensia na servisio pa Planifikashon Urbano (ROP), Domeinbeheer no por atendé e kantidad haltu di petishonan na tempu tokante duna tereno pa bibienda, inkluso flèt.
ROP i Domeinbeheer ta traha huntu pa abordá e obstakulonan ku ta hasi e proseso di duna konseho di planifikashon/desaroyo urbano tokante petishonan di klientenan mas largu. Pa logra esaki, nan a firma un protokòl di koperashon ku ta establesé gobernansa, kriteria, proseduranan di eksekushon i akuerdonan konkreto relashoná ku validashon di e kuadro di koperashon pa konseho di planifikashon/desaroyo urbano di konforme ku direktivanan di servisio pa Planifikashon Urbano (ROP).
E protokòl ta fihá riba trata petishonnan “simpel” manera; duna tereno promé bia, kambio di funshon, parti o ampliashon di parsela, konbertí di hür pa “erfpacht”, formalisashon di okupashon ilegal di tereno, i planonan di ekspanshon. Petishonnan ku no ta simpel lo ser trata individualmente i den bon koperashon di ambos organisashonnan.
E proseso ta enfoká solamente riba petishonnan di tereno i NO riba kuestionnan tékniko di konstrukshon di e kosnan riba e tereno. Pa esaki, mester sigui un proseso separá ku Servisio pa Planifikashon Urbano (ROP).
Tin tambe un grupo di trabou den Domeinbeheer ku ta konta ku personal èkstra pa yuda e proseso di konseho di planifikashon/desaroyo urbano bai mas lihe. Servisio pa Planifikashon Urbano (ROP) ta ser representá pa e direktor interino, Sr. Raymond Felisie, i Domeinbeheer ta ser representá pa e direktor, Sr. Jairo Martis.
