Notisia

Minister a instalá Tim Stratégiko i Grupo di Trabou: Disiplina Konsiente

Willemstad – Minister di Enseñansa, Siensia, Kultura i Deporte sr. Sithree van Heydoorn den presensia di Sekretario General di Ministerio di ESKD sra. Susan Larmonie-van Heydoorn a instalá e tim i grupo di trabou ku ta bai traha riba e ehekushon proyekto “Conscious Discipline”. E entrega di e ordenansa a bai den presensia di Direktor di Enseñansa i Siensia sr. Wladimir Kleinmoedig i Direktor di Kultura i Deporte sra. Lizette Sambo –Velder komo ku kolaboradornan di e sektornan aki ta bai traha den representashon di e áreanan di enseñansa, kultura i deporte.

E trayekto aki ta enserá un proyekto kaminda ta bai traha den estrecho koperashon ku tur e ‘stakeholder’ konserní. Huntu ta bai traha pa yega na un struktura kaminda ta bai apliká e metodologia aki den henter e ministerio i spesialmente pa e profeshonalnan di skol pré-eskolar, enseñansa di fundeshi regular i spesial i kuido despues di skol (naschoolse opvang) ku ta traha ku nos muchanan di 0 te ku 14 aña. Conscious Discipline na papiamentu “Disiplina Konsiente” ta un aserkamentu transformashonal, ku ta kuminsá serka adulto promé, den kua e persona konserní ta desaroyá 7 abilidat ku e meta pa logra regulashon propio ‘riba tereno  soshal emoshonal. E intenshon ta pa despues e adulto aki guia e hóben pa desaroyá mesun abilidatnan pa na su turno e hóben tambe siña regulá su mes ‘riba tereno sosial i emoshonal.

E Tim di Proyekto ku ‘riba nivel stratégiko ta plania ehekushon di rekapasitashon di profeshonalnan den desaroyo di kompetensianan sosial emoshonal pa medio di e metodologia di Disiplina Konsiente, a keda instalá. E grupo di enfoke pa re-kapasitashon di profeshonalnan ku ta guia i sostené nos muchanan  di 0 te ku 14 aña den nan desaroyo. Miembronan di e tim stratégiko ta sra. Sahayra Nisbet (presidente), sr. Euclides Perigault Monte, sra. Patricia Maria, sra. Hassenne Adams (sekretaris) i sra. Sonaline George.

Tambe Minister S. van Heydoorn a instalá e Grupo di Trabou  ku ta keda enkargá pa kordiná e implementashon di e plan di e proyekto “Conscious Discipline” di Ministerio di Enseñansa, Siensia, Kultura i Deporte. Nan ta bai kordiná i ta responsabilisá na e Tim di Proyekto. Miembronan di Grupo di Trabou ta sra. Patricia Maria (presidente), sra. Sahayra Nisbet (kordinadó), sra. Hassenne Adams, sr. Urlmar Concepcion, sra. Corine Blom, sra. Jakeema Hernandez, sr. David Medina, sra. Jenny Bregita i sra. Indra Melfor.

—

KOMUNIKASHON

**riba e potrètnan athunto por tuma nota kaminda minister ta firma e ordenansa i hasi entregá di e ordenansa na e presidente di e tim stratégiko i presidente di e grupo di trabou.