Proyekto di lei pa ku Seguridat na Skolnan ta kla. - Informashon tokante Gobièrnu di Kòrsou Bo opinion

Notisia

Proyekto di lei pa ku Seguridat na Skolnan ta kla.

Geplaatst op 02 October 2019 dor di Ministerio Enseñansa, Siensia, Kultura & Deporte

Willemstad- Resientemente Minister di Enseñansa, Siensia, Kultura i Deporte sra. Marilyn Alcalá-Wallé despues di a konsultá ku diferente instansha den komunidat, a hasi entrega di e proyekto di lei pa ku seguridat di skolnan na e Departamentu gobernamental hurídiko pa revishon, pa despues e proyekto di lei pasa pa Raad van Advies (RvA) i finalmente bai Parlamento pa tratamentu i aprobashon.

E proyekto di seguridat na skolnan ta atendé ku aspektonan ku mester tene kuenta kune pa garantisá un ambiente sano i di kalidat pa skolnan. E ambiente di enseñansa i edukashon mester ta sigurá. Aki ta trata tantu di seguridat físiko komo seguridat sosial. Ora ta referí na seguridat físiko, por pensa riba e.o. kurá di skol bon será, kamara di vigilansia, aparato di paga kandela etc.

Seguridat sosial tin referensia riba entre otro evitá pèstmentu/tentamentu, agreshon, intimidashon seksual, robo i destrukshon. Muchanan mester un ambiente sano i sigur pa nan por siña i e kuerpo di personal na skol mester di e mesun tipo di ambiente pa nan por traha aden.

E trayekto di siguridat na skolnan ta un di e tres prioridatnan ku direktivanan di skol a pidi gobièrnu pa aselerá. Gobièrnu ta konsiente ku esaki ta importante i ta hasiendo tur esfuerso pa logra un klima mas agradabel na skolnan na bienestar di un i tur.

 

*********************************************

Ministerio konserní