Proyekto grandi di digitalisashon di Archivo Kolonial Kòrsou a kuminsá ofisialmente - Informashon tokante Gobièrnu di Kòrsou

Notisia

Maneho di Gobernashon, Planifikashon i Servisio Públiko
 

Proyekto grandi di digitalisashon di Archivo Kolonial Kòrsou a kuminsá ofisialmente

Publiká riba 20 Òktober 2026

Willemstad – Archivo Nashonal Kòrsou resientemente a ranka sali ku e proyekto grandi pa digitalisá mas ku 2,6 mion página di su kolekshon históriko. Ku e inisiativa akí, Archivo Nashonal Kòrsou ke hasi e buki-, artíkulo- i dokumentonan balioso aksesibel pa públiko pa medio di su wèpsait ofisial (e-depot). Personal lokal a kuminsá kaba ku e trabou di skèn usando skènernan di un nivel teknológiko haltu. 

Empleado lokal i ehekushon di e trabou 

Pa efektuá e trabou di digitalisashon di tur dia, e ‘kwartiermaker’ di e proyekto, Richard Beumer (Karmac), a rekrutá i kontratá kuater operador di skèner lokal. E personal lokal aki ta ehekutá e trabou usando kuater skèner moderno ku a yega Kòrsou resientemente for di eksterior. 

Garantia di kalidat i akseso pa públiko 

Pa garantisá un bon organisashon di e archivo digital, kada dokumento ku keda di skèn ta risibí un kódigo di Informashon di referensia ku ta kumpli ku e nòrma internashonal di archivo (International Standard Archival Description – ISAD). Esaki ta perkurá ku por determiná e orígen di kada dokumento ku fasilidat. 

E dokumentonan digitalisá lo keda publiká den diferente fase (tranches) riba e wèpsait ofisial di Archivo Nashonal. E e-depot nobo aki ta un paso signifikativo pa mehorá akseso na nos historia i patrimonio kultural.

Finansiamentu di e proyekto 

E proyekto di digitalisashon ta keda finansiá pa e supsidionan di Reino Hulandes pa medio e programa: “Aktieagenda Slavernijverleden”.  

Gobiernu di Kòrsou a entrega un petishon pa esaki serka e Ministerio Hulandes di Asuntunan di Interior i Relashonnan den Reino (BZK). Den ougùstùs 2025, e direktor general di Relashonnan den Reino a aprobá e agenda di akshon pa e proyekto aki.