Publiká riba 16 Yüni 2021
WILLEMSTAD – Servisio pa Obra Públiko (OW) ta partisipá ku for di djamars 15 di yüni 2021 a kontinuá ku trabounan di e proyekto pa drecha un parti di e sistema di riolering den área di Otrobanda, i pa konektá esaki ku e planta di purifikashon di awa na Kleinhofje. E trabounan ku a kuminsá ta konsistí di 3 parti.
Parti di sistema di pipanan St. Annabaai:
Trabounan lo tuma lugá riba e kaya nort paralelo ku Pater Euwensweg for di Warda di Polis Otrobanda te na e entrada di CMC (rotònde). E trabounan ta dura di djamars 15 di yüni 2021 te ku djabièrnè 18 di yüni 2021.
E trabou akí ta konsistí di koba diferente buraku (proefgaten) ku lo sera inmediatamente despues di registrashon.
Parti di renovashon i mantenshon preventivo di riolering prinsipal di Otrobanda
Tambe ta hasi trabounan di mantenshon di e riol prinsipal, ku sa tuma lugá kada luna. Esaki ta enserá limpiesa di e tubunan i hasi inspekshon ku kámara den e tubunan.
E mantenshon ta tuma lugá den 2 fase. Fase 1 ta di Warda di Polis Otrobanda te ku El Tributo. Durashon ta 10 dia di trabou. Fase 2 ta di El Tributo te ku Jan Otzenstraat. E trabounan di fase 2 lo dura 9 dia di trabou.
Parti di renovashon di riol prinsipal Otrobanda
E trabounan di renovashon di e riol prinsipal di Otrobanda a kuminsá dia 15 di yüni i tin un durashon di 5 siman. E kareteranan ku lo usa pa hasi trabounan di renobashon di e sistema di riol ta Rector Zwijsenstraat – Pater Eeuwensweg – Van Eyck van Voorthuyzenweg te ku rotònde Arubastraat.
OW ta pidi pa por fabor tuma bon nota di esaki i kore ku koutela riba e kareteranan menshoná.
