WILLEMSTAD – E proyekto “Tuma Bo Pèrmit” ku a keda lansá pa Servisio di Atmishon a yega su final. Durante e periodo di 3 di aprel pa 7 di yüni 2023, Servisio di Atmishon a habri mas espasio pa mas persona por a traha sita pa tuma nan título di residensia. Durante e proyekto “Tuma Bo Pèrmit” un kantidat di 2007 título di residensia den forma di stèmpel (den pasport)a keda otorgá. Servisio di Atmishon ta gradisí tur persona ku a hasi uzo di e oportunidat akí i a akudí pa tuma nan título di residensia.
Servisio di Atmishon tabata anunsiá riba su página di Facebook i Instagram kua ta e fechanan ku ta disponibel pa traha sita. Personanan ku a risibí karta di desishon positivo por a traha sita riba e fechanan ku a keda anunsiá. Aparte di esaki, Servisio di Atmishon tabata yama tur dia personanan ku tabatin un sita kaba i duna nan un fecha mas delantá.
Sita
Durante e proyekto “Tuma bo Pèrmit” a habri espasio pa mas persona por a traha sita pa tur servisio ku Servisio di Atmishon ta ofresé. Un total di 3082 sita a keda trahá. Apesar ku Servisio di Atmishon tabata tuma kontakto ku personanan pa un fecha mas delantá, 38.6% (1191) di e personanan no a akudí riba e fecha di nan sita. Servisio di Atmishon ta lamentá esaki. Esaki a stroba esnan ku si kier a bin tuma nan título di residensia òf hasi uso di un di e otro servisionan, di haña un fecha mas delantá. Servisio di Atmishon ta spera ku den futuro ku presentá mas proyekto na benefisio di nos klientenan, ku nan lo sa di reakshoná debidamente riba e proyekto.
Pa mas informashon tokante Servisio di Atmishon por bishitá www.immigrationcur.org i sigui e página di Facebook i Instagram Admission Office Curaçao.
