Publiká riba 09 Desèmber 2022
Willemstad – Minister Charles Cooper huntu ku Servisio pa Obra Públiko (OW) ta informá ku dia 16 di desèmber próksimo e periodo di vakashon di kontratistanan ta kuminsá. Relashoná ku esaki, proyektonan grandi di mantenshon di kaya lo kontinuá den yanüari di 2023, esta despues di e periodo di vakashon.
Durante 2022, Minister Cooper huntu ku OW a bin ta ehekutá diferente proyekto di mantenshon di kaminda, entre otro Don Martina Boulevard, Kaminda Statius van Eps, parti di Weg naar Wespunt, i Saturnusstraat. Tambe a hasi tur preparashon pa kuminsá ku Helmin Wiels Boulevard, pero debí na e situashon di falta di asfalt i kondishon di wer, e proyekto aki awor lo kontinuá den 2023.
E sentral di asfalt lo sera pues dia 16 di desèmber. Lokual ku si ta sigui ta limpiamentu di roinan, mantenshon di matanan, i trabounan chikitu. Tambe Selikor mester hasi e limpiesa ku ta toka na nan.
Den 2023, Minister Cooper i OW lo sigui traha riba nos infrastruktura na benefisio di pueblo di Kòrsou.
