Qredits Kòrsou a invertí un total di 1 mion den ekonomia lokal - Informashon tokante Gobièrnu di Kòrsou Bo opinion

Notisia

Qredits Kòrsou a invertí un total di 1 mion den ekonomia lokal

Geplaatst op 11 September 2018 dor di Ministerio Desaroyo Ekonómiko

WILLEMSTAD, Na luna di aprel di e aña aki a habri e ofisina di Qredits aki na Kòrsou. Di luna di aprel te ku awor e ofisina di krédito ya a otorgá un total di 1 mion florin na fiansanan nobo na empresanan lokal. E finansiamentunan aki a bai tantu na empresarionan nobo ku awor kier kuminsá, komo empresarionan ku ta deseá di krese i/òf ekspandé nan negoshi aki na Kòrsou.

Dia 11 di sèptèmber Minister di Desaroyo Ekonómiko, sr. Steven Martina huntu ku Ministerio di Desaroyo Ekonómiko i Qredits simbólikamente a hasi entrega di e di 32 fiansa ku Qredits Kòrsou a otorgá for di nan apertura na aprel di e aña aki. Ku e montante ku e empresario aki a risibí, Qredits a alkansá un total di 1 mion florin invertí den ekonomia di Kòrsou. Minister Martina ta di opinion ku e trabou ku Qredits ta ehersé ta supli perfektamente den e nesesidat ku Kòrsou tabatin pa finansiamentu alternativo. Empresanan duradero i stabil ta di sumo importansia pa yuda reforsá nos ekonomia, di e forma aki nos ta hasi nos pais finansieramente mas fuerte.
Durante e 5 lunanan tras di lomba Qredits Kòrsou a finansiá un total di 21 empresanan nobo i 11 empresa eksistente. E empresanan aki ta varia for di restorant, artesania, pelukeria, kantina di kuminda vegetariano, komersio por detal i diferente otro tipo di empresa.

Soñonan empresarial
Direktor general i fundador di Qredits, sr. Elwin Groenevelt, ta sumamente orguyoso ku dentro di 5 luna di eksistensia di Qredits Kòrsou esaki ya por a yuda realisá e soño di asina tantu empresario. “E meta ta pa habri oportunidat di finansiamentu i coaching pa un i tur ku tin abilidatnan empresarial i un bon plan kon pa logra esaki. Di e forma aki Qredits ya a bin ta yuda mas di 20.000 empresario tantu na Ulanda komo den Karibe. Mi ta hopi kontentu ku e aña aki Qredits a haña e oportunidat di promové entrepreneurship na Kòrsou tambe. Durante e 5 lunanan tras di lomba nos a risibí masha reakshon positivo riba e echo ku nos a habri un filial na Kòrsou. Ku Qredits nos ta brinda un alternativa finansiero real pa por habri òf amplia bo empresa.

Mas ku solamente krédito
E ofisina di Qredits Kòrsou a bira e di 4 filial di Qredits den region karibense. sra Raiska Herrera i e tim di Qredits Kòrsou ta okupá diariamente ku evaluashon di e tantísimo petishonnan ku Qredits Kòrsou ta risibí. No solamente e ofisina di Qredits Kòrsou ta ofresé empresarionan e posibilidat di un fiansa te ku Fls. 50.000,- pero tambe e empresario por haña coaching i yudansa pa formulá su propio plan empresarial. Tantu na Boneiru, Aruba i St. Maarten empresarionan ya ta hasi uso aktivamente di tur e posibilidatnan ku Qredits ta ofresé.


Ministerio konserní