Publiká riba 15 Mei 2020
WILLEMSTAD- Dos aña pasa Qredits a keda fundá aki na Kòrsou i for di e dia aki ya e fundashon a sa di yuda mas di 160 empresario lokal pa sea habri nan propio negoshi òf pa ekspandé i/òf inová. Debí na e krísis ekonómiko kousá pa e pandemia di COVID-19, hopi empresario ta keda konfrontá ku entre otro problemanan finansiero ku por resultá den un situashon kaminda nan mester sera nan negoshi. Pa trata na evitá esaki mas tantu posibel Qredits Kòrsou a uni forsa ku Ministerio di Desaroyo Ekonómiko (MEO), OBNA i Korpodeko pa asina ofresé empresarionan lokal (tantu empresanan chikí komo mediano) alternativanan atraktivo pa por pasa dor di e periodo difísil aki.
Qredits for di un prinsipio a duna di konosé ku den nan kompromiso pa yuda tantu e mundu empresarial komo tambe reforsá ekonomia di nos pais, nan lo ofresé nan klientela un fiansa empresarial na un interes di 2% en bes di e interes normal di 9.75%. Un total di 130 kliente di Qredits ya a risibí esaki entretantu pa un periodo di grasia ku durashon di 6 luna.
Pa por yuda krea e oportunidat pa Qredits sigui yuda mas tantu empresario lokal posibel ku un krédito transitorio, Ministerio di Desaroyo Ekonómiko(MEO) a pone un suma di Fls. 200.000 na disponibilidat di Qredits.
Apesar ku den e proseso di sosten empresarial kada instansia finansiero lo implementá su propio proseso di krédito, Qredits, Korpodeko i OBNA lo traha den estrecho kolaborashon ku MEO, e plataforma di MiNegoshi i Fondo di Sosten pa asina prosesá kada petishon ku drenta. Pa fasilitá e proseso aun mas, Qredits a hasi posibel tambe pa klientenan por firma nan kontrato di finansiamentu di forma digital i asina hasi posibel pa sostené empresarionan sin mester hasi uso di kontakto físiko ku e kliente.
Aparte di e sosten finansiero Qredits Kòrsou a implementá tambe resientemente e asina yamá sistema di “Crisis Coaching”. Esaki ta enserá ku profeshonalnan i/òf empresarionan ku eksperensia, boluntariamente ta ofresé seshonnan di guia i coaching virtual via Qredits pa asina klientenan ku tin nesesidat pa esaki por risibí èkstra sosten i guia pa surpasá e sirkunstansianan aktual. MiNegoshi tambe di otro banda a buska konsehero i èkstra coach pa asina forma un tim kualifiká di forma ku mas tantu empresario posibel por risibí e sosten nesesario.
