Notisia

WILLEMSTAD – Djasabra 29 di mei último e miembronan di e ‘Rampenbeheersingsorganisatie (RBo) a bini huntu pa un training en konekshon ku temporada di orkan. E temporada di orkan 2021 ta kore for di 1 di yüni 2021 te ku 30 di novèmber 2021.

E ‘Rampenbeheersingsorganisatie’ (RBo) di Kòrsou  ta e tim di kalamidat responsabel ku den un situashon di krísis òf kalamidat ta manehá e situashon i ta mitigá e riesgonan di un krísis òf kalamidat.

E RBo ta konsistí di 10 Emergency Support Functions (ESF) i nan ‘liasons’ ku ta e.o. Polis, Brantwer, Ambulans, UTS, BT&P, WJZ, Aqualectra, Servisio di Obranan Públiko, Ministerio di SOAW, Direktorado di Komunikashon i Informashon, Ministerio di Hustisia, Ministerio di Desaroyo Ekonómiko, Kustwacht, Meteo, Ministerio di GMN, Krus Kòrá, CITRO i e ‘Vrijwilligers Crisiscenter Assistenten’.

Durante e training di djasabra último a pasa den e prosesonan di plan di kalamidat pa ku temporada di orkan, BT&P a duna training tokante uso di ‘portofoon’ den situashon di kalamidat, miembronan di radio Verona tambe a duna training tokante uso di ‘radio amateur’ i posibilidatnan ku esaki ta brinda den un kalamidat.

Kada un ESF/Liaison a duna un ‘update’ di nan preparashon pa e temporada di orkan ku ta kuminsá awe promé di yüni. Brantwer a ekipá e diferente pòstnan ku èkstra ekipo ku por usa den kuadro di e temporada di orkan. Kuerpo polisial i tambe servisio di ambulans ta prepará pa kualke eventualidat den kuadro di e temporada di orkan. Servisio di Obranan Públiko tambe ta prepará i a hasi inspekshon na e shèlternan ku ta:

• Maris Stella (ex Zwijsen College) – Adrès: Grebbelinieweg (Steenrijk)
• Eligia Martier (ex St. Rosa de Lima) – Adrès: Oosterbeekstraat (CherAsile)
• Kolegio Annie Koenraad – Adrès: Kaya Tera Kora (Tera Kora)
• Rode Kruis gebouw – Adrès: Weg naar Westpunt (Barber)

E tim di kalamidat ta hinter aña aktivo bou di kordinashon di Direktorado di Kontròl di Riesgo i Maneho pa Kalamidat. Konhuntamente e tim di kalamidat ta yuda mitigá e konsekuensianan ku un krísis òf kalamidat por tin na Kòrsou.

Nos ta urgí tur hende den kuadro di preparashon pa temporada di orkan 2021:

1. Sòru di tin un plan di kalamidat na kas pa den kaso di un menasa di orkan; 
2. Kontrolá ekiponan di emergensia i ekipo ku ta usa bateria manera radio, flèshlait i telefòn selular. Sòru pa èkstra bateria; 
3. Sòru pa kuminda ku no ta daña i sufisiente awa pa bebe (3 lìter pa persona pa dia) pa 3 dia; 
4. Kòrta palu i mata rondó di kas i limpia bo kurá ya ku takinan ku ta bula rònt por kousa daño na bo kas;

Pa keda informá:

Bishitá  www.kalamidat.cw  i ‘download’ e diferente foyeto di informashon tokante orkan pero tambe e diferente krísis òf kalamidatnan ku por asotá Kòrsou.