Ultimo dianan, SOAB su rapòrtnan di ouditoria interno tokante funshonamentu di e proseso di kobramentu di impuesto tabata frekuentemente den notisia. Minister di Finansa a kompartí e rapòrtnan ku Parlamento dia 25 di mart 2024, i pues nan ta disponibel públikamente na www.parlamento.cw (kaso no. 2024/009551). E rapòrtnan aki tambe ta inkluí e komentario di Ontvanger den kuadro di e asina yamá hoor en wederhoor. Minister di Finansa ta lamentá ku ta menshoná nòmber di personanan i/òf empresanan den prensa, miéntras ku ta establesé ku den e rapòrtnan di SOAB no ta menshoná ningun nomber di personanan òf empresanan. Esaki ta inaseptabel pa Minister di Finansa i ta meresé un investigashon separá.
Dia 30 di mart 2024, e Minister di Finansa interino a emití un komunikado di prensa kaminda ta delineá e akshonnan ku ta wòrdu tumá a base di e rapòrtnan di SOAB. Un di e akshonnan aki ta enserá ku lo desaroyá un plan di mehorashon. Komo kontesta riba preokupashonnan ekspresá dor di Sekretario di Estado di Hulanda tokante e resultadonan den e rapòrtnan di SOAB, Minister di Finansa a disidí tambe pa inkluí e akshonnan proponé den e agènda di implementashon di e Pakete di Pais.
E plan di mehorashon a wordu traha i su implementashon ta wòrdu vigilá pa medio di relatonan periódiko den kuadro di e Pakete di Pais. Varios mehorashon, inkluyendo e deskontinuashon di pagonan adelantá (fòrskòt) riba restitushon i e implementashon di un kódigo di kondukta revisá, a wòrdu implementá kaba. Ademas, SOAB ta keda hasi ouditoria interno pa monitoriá kumplimentu ku e guianan di kobransa. E rapòrtnan riba e investigashonnan, ku ta den nan fase final aktualmente, lo duna e bista nesesario pa determiná si ta logrando progreso den e kòntròl interno di e prosesonan di kobransa.
Minister di Finansa ta konsiderá importante pa kobransa di impuesto sosode konforme leinan i/òf guianan aplikabel. Pesei lo keda hasi tur esfuerso pa logra e meta aki.
