Notisia

WILLEMSTAD – Ministerio di Enseñansa, Siensia, Kultura i Deporte pa medio di Direktiva di Skolnan Públiko ta informá di re-ukibashon di alumnonan di Skol speshal Myrna Dovale i C.M.L. Maduro. E informashon ta pa Pueblo di Kòrsou tuma nota di desishonnan pa ku e skolnan aki.

Tur mucha ku tin un nesesidat speshal ku ta forma parti di nos komunidat, tin derechi di risibí enseñansa na nan nivel.  For di e edat di 4 aña por inskribí muchanan na Skol Myrna Dovale. Skol Myrna Dovale ta speshal, úniko den su sorto den skolnan speshal. Nos skol di Gobièrnu, Skol Myrna Dovale ta e úniko skol pa alumnonan ku un desabilidat ouditivo i/òf idioma na Kòrsou. For di aña 1970 Skol Myrna Dovale ta e úniko skol na Kòrsou ku ta brinda enseñansa na muchanan ku un desabilidat ouditivo,  TOS i/òf autismo riba 3 nivel di enseñansa: LOM, MLK. ZMLK; abase di nesesidat di alumno. Atraves di añanan e grupo di enfoke di skol Myrna Dovale a bini ta kambia. Ainda nos ta duna enseñansa na alumnonan ku un desabilidat ouditivo i alumnonan ku un desabilidat di idioma (Taal Ontwikkeling Stoornis (TOS)), pero mas i mas Skol Myrna Dovale ta akaparando muchanan ku autismo. E populashon ku tin e nesesidat spesífiko aki a bini ta krese supstansialmente.

E grupo di enfoke di Skol Myrna Dovale a krese asina tantu, ku e lokalidat na Wageningenstraat no ta akapará e populashon den su totalidat mas. Enbista ku e kantidat di muchanan ku mester haña un lugá pa sigui enseñansa na skol Myrna Dovale ta mas tantu ku e kantidat di alumno ku e lokalidat aktual na Wageningenstraat por akapará, un mudansa di nos skol Myrna Dovale pa un lokalidat di skol mas grandi ta indispensabel.

Komo Gobièrnu responsabel nos ta kumpli ku e derecho ku kada mucha tin di sigui enseñansa riba su nivel. Ku e koutela i profeshonalismo nesesario, Servisio di Skolnan Públiko, a buska un solushon pa kontinuidat di enseñansa pa tur nos muchanan. Esaki ta atkerí koperashon, kompreshon, fleksibilidat i re-ubikamentu di nos muchanan pa asina na un manera efektivo i efisiente nos hasi uso di infrastruktura ku nos tin na nos disposishon. Direktiva di Skolnan Públiko, kende ta responsasbel pa maneho di skolnan públiko di Gobièrnu a hasi evaluashon i skohe pa hasi un re-alokashon di alumnonan di un di su skolnan di fundeshi.

Den konkreto entrante 1 di ougùstùs 2023:

1. Nos alumnonan di skol di enseñansa di fundeshi, skol C.M.L. Maduro, den konkordansha ku mayor, ta keda re-aloká na skolnan den serkania.

2. Nos alumnonan ku mester sigui enseñansa na Skol Myrna Dovale ta keda ubiká na lokalidat di Gobièrnu na Kurá Piedra, skol C.M.L. Maduro.

Tantu mayornan, alumnonan i personal di skolnan a keda informá. E informashon aki ta parti di e trayekto di komunikashon.

—

Komunikashon

Direktiva di Skolnan Públiko

MAS NOTISIA

Ministerio konserní: Enseñansa, Siensia, Kultura & Deporte