Notisia

WILLEMSTAD – Djamars 29 di òktober a tuma lugá un enkuentro entre Minister di ESKD, señor Sithree van Heydoorn, su gabinete, un representante di gabinete di Ministerio di BPD, i representantenan di sindikato DOEN. Meta di e enkuentro aki tabata pa skucha e puntonan di interes di sindikato DOEN.

Despues di e reunion akí, minister a tuma nota di un relato inkorekto tokante e enkuentro i e palabrashonnan hasí. E minister ta konsiderá nesesario pa aklará algun punto pa motibu di transparensia i ekspektativanan realístiko pa loke ta trata e siguiente pasonan.

Durante e enkuentro, sindikado DOEN a duna un presentashon di PowerPoint i a presentá vários punto di interes. Manera e sindikato mes a indiká, e bista general di posibel proposishonnan presentá no a keda elaborá i falta e kuadro hurídiko i finasiero. E elaborashon aki ta krusial pa evaluá e faktibilidat di e proposishonnan. E sindikato a proponé pa lanta un grupo di trabou den kua representantenan di DOEN, ESKD i BPD lo desaroyá konhuntamente posibel solushon nan, di manera ku finalmente por yega na proposishon nan konkreto ku por tuma desishon.

Durante e reunion aki, e minister a apstené di duna opinion tokante e kontenido di e proposishonnan, pero sí a hasi preguntanan krítiko tokante nan elaborashon i faktibilidat. Tantu e minister komo e representante di BPD a indiká ku e periodo di tres siman proponé no ta realístiko. E kompleksidat di e asuntunan ta rekerí investigashon profundo i konseho kuidadoso. Ademas a aklará na e sindikatonan ku e ministerio di ESKD ya ta trahando riba vários trayekto pa drecha e posishon hurídiko pa dosentenan i no-dosentenan, mientras ku BPD ta responsabel pa e proseduranan andando rondó di e terminashon di e artikulo 9 di e lei di redukshon di kondishonnan laboral. Pa e motibonan aki, un periodo di tres siman no ta faktibel. Tambe a enfatisá durante e konsulta ku desaroyá e solushonnan proponé ta rekerí un aserkamentu multidisiplinario, den kua e envolvimentu di e departamentunan di Legislashon i Asuntunan Hurídiko (WJZ) i Finansa tambe ta esensial.

Ademas e minister a enfatisá ku e medida menshoná dor di sindikato DOEN di 12.5% ​​riba kondishonnan laboral no tabata un medida, sino un kondishon imponé pa Hulanda pa prestamonan pa sigura e gastonan operashonal di gobièrnu i sosten na komunidat durante di e pandemia di COVID. Esaki ta inkluí salarionan di empleado pٔúbliko, dosente, no-dosente i ekivalente. Durante e periodo aki, mandatarionan, empleado públiko i ekivalente a hasi sakrifisio pa motibu di solidaridat, apesar di e retonan grandi. P’esei ta keda inkorekto pa sigui enfatisá esaki komo un medida, un ponesia ku no a keda kontradesí door di e sindikato.

Minister van Heydoorn ta indiká ku e sindikato DOEN no ta e úniko gremio sindikal ku ta representá interes di dosente i no-dosente i ku mester tene kuenta ku esaki tambe. P’esei e minister a limitá su mes na skucha e puntonan di interes i papia tokante e pasonan di e proseso.

Finalmente, Minister van Heydoorn ta enfatisá: “Komo mandatario, representante di pueblo i sindikato, nos tin e responsabilidat pa representá e interesnan di esnan ku a depositá nan konfiansa den nos. E responsabilidat aki ta nifiká ku nos mester ta transparente i duna informashon korekto. Speransa falsu i informashon inkorekto ta mina konfiansa i e boluntat pa traha huntu pa haña solushonnan duradero.”

—

Sr.Sithree van Heydoorn

Minister di Enseñansa, Siensia, Kultura i Deporte

MAS NOTISIA

Ministerio konserní: Enseñansa, Siensia, Kultura & Deporte