Publiká riba 04 Mart 2024
Djabièrnè 1 di mart 2024 UO Reclassering den presensia di Minister di Hustisia, sr. Shalten Hato, a lansa e proyekto “EKIPÁ; Na Kaminda pa mi Trabou”.
E proyekto ta enfoká riba personanan entre 18 i 45 aña di edat ku a bini den kontakto ku hustisia i tin difikultat pa buska i haña trabou. Esaki sea dor ku nan tin un antesedente ku hustisia òf ta enkaresé di abilidat nesesario pa funshoná optimal riba e tereno laboral.
“Na Kaminda pa mi Trabou” tin komo meta pa minimalisá residivismo bou di personanan ku a bini den kontakto ku hustisia dor di ekipá nan pa nan por funshoná di manera efektivo den komunidat i ta éksitoso riba e area laboral.
Durante di e trayekto ta bai brinda e partisipante formashon riba 3 area:
Tambe tin e posibilidat pa guia e partisipante ku tin interes pa lanta su propio negoshi.
Banda di e trayekto di formashon, “Na Kaminda pa mi Trabou” ta ofresé guia i sosten na e partisipante dor di un life-/ jobcoach. E guia lo ta personalisá riba nesesidat di kada partisipante individual. Lo empoderá, guia i sostené e partisipante den su trayekto pa buska, haña i mantené trabou. Den kaso ku ta nesesario lo intermediá i duna un konseho positivo pa e partisipante por haña su papel di bon kondukta spesífikamente pa e por traha.
Na momentu ku e partisipante haña un trabou, e job-/ lifecoach lo keda den kontakto estrecho ku e partisipante i su doño di trabou pa por monitoriá, evaluá i duna sosten durante e proseso. Tambe lo enfoká, yuda i duna guia riba e otro areanan di bida di e partisipante ku meresé atenshon.
Na final di e trayekto lo keda mantené kontakto estrecho ku e partisipante, su trabou i su entorno sosial pa por garantisá durabilidat di e resultadonan alkansá.
E proyekto ta bai tin un durashon di dos aña i ta e intenshon pa durante e periodo aki ekipá 30 persona (3 diferente grupo di 10 persona) pa por funshoná di manera efektivo riba e merkado laboral.
Tur kos ta kla pa ranka sali.
Durante di e aktividat di lansamentu di e proyekto “EKIPÁ; Na Kaminda pa mi Trabou” partisipantenan di e promé grupo ya a firma un kontrato di disposishon pa inisiá ku e trayekto. E entusiasmo ta grandi tantu serka e team di UO Reclassering komo e partisipantenan. Nos ta deseá kada partisipante hopi determinashon i éksito.