Publiká riba 04 Òktober 2016
Willemstad- Mirando e kalifikashon di ta kumpli parsialmente (Partially Compliant) den kuadro di Peer 2 Review di Organisashon pa Koperashon i Desaroyo Ekonómiko (OECD na inglés) i e konvikshon ku e kalifikashon aki no ta refleha e hurisdikshon di Kòrsou, a inisia e trayekto pa adelantá e reevaluashon pa haña un kalifikashon nobo.
Den kuadro di e trayekto di informashon na e Sekretariado di OECD a substansiá ku e kalifikashon di kumplimentu den gran parti (Largely Compliant) ta kuadra mas ku Kòrsou. Siman pasá, despues di un presentashon dor di Kòrsou na Paris, e Grupo di Paisnan di Peer 2 Review a bai di akuerdo pa adelantá e reevaluashon di Kòrsou.
Partikularmente e projekto di lei ku tin na Parlamentu ku ta rigi aktualisashon di e banko di informashon di Kámara di Komersio ta di gran importansha pa logra obtené e kalifikashon ku nos ta kumpli den gran parti. Esaki debí ku lo kuminsá ku e reevaluashon e aña aki mes. Ta p’esei ta importante pa Parlamentu trata e lei aki mas pronto posibel.
E kalifikashon di Largely Compliant ta di sumo importansia afin ku nos ta wòrdu retirá di e lista pretu di otro paisnan i no keda poné mas riba lista nan pretu.
