Notisia

WILLEMSTAD – Ministerio di Enseñansa, Siensia, Kultura i Deporte (ESKD) a selebrá Dia 1 di desèmber 2022: Dia di Enseñansa grandemente huntu ku un públiko di mas ku 250 partisipante. Durante di e aktividat Minister di Enseñansa Sr. Sithree van Heydoorn den presensia di Gabinete Pisas a presentá su vishon pa mehorashon pa enseñansa. Tambe Minister a presentá e siguiente informashon: Ki ta tur e mehorashon nan i kon ta sigui ku e mehorashon nan. Sekretario-General sra. Susan Larmonie-van Heydoorn huntu ku Direktor di Enseñansa i Siensia sr. Wladimir Kleinmoedig tambe a kòmbersá i deliberá riba e operashon di mehorashon pa enseñansa.

Tur stakeholder manera Sindikato, Direktiva di Skolnan, Skolnan di Fundeshi, Skolnan Sekundario, Fundashonnan di enseñansa, Universidatnan, Komishon di mayornan, i vários organisashon mas ku ta traha huntu ku enseñansa a keda invitá. Nan por a manda 1 òf 2 persona pa partisipá na e aktividat aki na Marriot Beach Resort. E selebrashon a kuminsá ku un ante-sala kaminda vários persona a kòmbersá ku kolaboradó di ministerio sra. Jakeema Hernandes i alabes deseá henter e vèlt di enseñansa pabien. E programashon ofisial a keda guiá pa moderadó sra. Scarlet Zalm, alumnonan di Kolegio Don Sarto a kanta himno i presentá dos bunita kansion bou di guia di sra. Anne Alse. Henter e programashon a keda transmití ‘live’ via di retnan sosial di Minister i Ministerio di Enseñansa, Siensia, Kultura i Deporte. Mayoroia di e informashon a keda presentá di forma di produkshon di video ku tambe ta keda publiká den e dianan ku ta sigui.

Minister su vishon pa mehorashon di enseñansa ta: “Enseñansa mester forma e mucha di un manera holístiko pa e bira e hende ku pleno kapasidat i potensial, ku e identidat kolektivo pa partisipá di un forma outónomo, responsabel, konstruktivo i kontribuí asina na desaroyo ekonómiko, sosial, kultural i spiritual di nos sosiedat”.

Esaki ta base pa formashon di e siudadano di forma holístiko pa e por kontribuí na desaroyo di nos nashon pa asina tur siudadano por progresá i kontribuí na adelanto di nos pais di forma moderno. Dos faktor importante pa e vishon ta: e mucha/studiante i e dosente/maestro. Ta nan dos huntu ta hiba na éksito den enseñansa. Éksito i realisashon di e vishon ta tuma lugá al final den e skol, den e klas, den e interakshon di tur dia entre e maestro i alumnonan. E maestro di skol ta instrumental pa nos brinda nos muchanan un edukashon mas kompleto, holístiko i optimal. Ta e maestro di skol mester apliká i krea sinergia den tur e áreanan i aspektonan di enseñansa pa por garantisá ku nos muchanan ta haña un edukashon na nivel i di kalidat.

Na final di e reflekshon minister di ESKD sr. Sithree van Heydoorn a hasi entrega ofisial di dokumentashonnan konkreto pa ku enseñansa. E dokumentonan ku a keda entrega ta:
1. Ordenansa Promoshon personal pa enseñansa, (Landsbesluit Bevordering Onderwijzend Personeel);
2. Proposishon nota di maneho dianan di vakashon pa personal no-dosente (Beleidsnotitie Vakantiedagen niet onderwijzend personeel);
3. Ordenansa ministerial pa regla sistema di “normjaartaak” pa personal di enseñansa (Ministeriële beschikking regeling van de normjaartaak systeem onderwijzend personeel).

Minister a hasi petishon na Sektor di Enseñansa pa trata e dokumentonan aki i pidi pa esaki nan por bira realidat pa e aña eskolar 2023/2024.

Ministerio di ESKD ta mira bèk riba un aktividat eksitoso i ta sumamente kontentu ku tur a personanan ku a partisipá.

Danki na kada un di e alumno- i dosentenan di Skol di Fundeshi St. Fransiscus College i Gouv. Lauffer VSBO, Direktiva di skol, representantenan di sindikato ku a partisipá na e produkshonnan.

—
KOMUNIKASHON

*Pa mas potrèt di e aktividat bishitá: Dia di Enseñansa 2022  i bishitá e facebook di Ministerio pa tur potrèt di preparashon i produkshonnan.

MAS NOTISIA

Ministerio konserní: Enseñansa, Siensia, Kultura & Deporte