Publiká riba 24 Sèptèmber 2020
WILLEMSTAD – Siman di kultura ta aserkando i tur aña nos komunidat a kustumbrá di selebrá esaki en grande pa medio di diferente aktividatnan kultural rònt Kòrsou. COVID-19 a kambia hopi kos rondó di nos, inkluso algun di nos kustumbernan. E aña aki por ehèmpel, Gobièrnu di Kòrsou mester a bin ku maneranan alternativo pa tòg nos selebrá i reflekshoná riba nos kultura i e impakto ku esaki tin riba desaroyo di nos mes komo ser humano, pero tambe riba adelanto di nos pais.
Siman di kultura e aña akí ta karga e tema “Reflekshon Kultural” i lo tuma lugá for di djadumingu 27 di sèptèmber te ku djasabra 10 di òktober próksimo. E reflekshon kultural ku Gobièrnu di Kòrsou ta deseá di alkansá ku e tema akí ta inkluí entre otro stimulashon di mas konsiensia kultural serka nos pueblo, motivashon di nos hendenan pa eksplorá i brasa nos herensia den su sentido mas amplio i traha riba fortifikashon di nos nashon i identidat kreando un pueblo konsiente i orguyoso di su kultura.
Durante e siman di kultura, Gobièrnu ta hasi un yamada na pueblo pa enfoká riba preguntanan manera, “Kiko kultura ta nifiká p’ami?”, “Di ki forma ami ta biba mi kultura?” i “kiko kultura por nifiká pa mi pais?”. Ku esakinan den mente, Gobièrnu a duna e siman aki e lema di “Komprondé, konektá i kosechá”. Mirando adaptashonnan ku mester a tuma lugá den kuadro di COVID-19, e aktividatnan di e aña aki lo sosodé primordialmente via di kanalnan digital, medionan sosial i tambe televishon.
E echo ku e aña aki nos pais ta kumpli 10 aña komo pais outónomo den Reino Hulandes, ta agregá un èkstra toke na e reflekshon kultural ku nos kada un lo mester hasi. Poniendo un asento èkstra riba unda nos ta awe komo individual i komo pais, i dunando realse na e desaroyo kultural i personal ku ainda mester sosodé pa nos por yega kaminda nos ta deseá.
Gobièrnu di Kòrsou debidamente lo sigui informá tokante e diferente aktividatnan ku lo tuma lugá durante di e siman di reflekshon kultural i di ki forma pueblo por partisipá i interkambiá puntonan di bista, historia, konosementu, eksperensia, talento i kreatividat.
For di awor, Gobièrnu ta hasi un yamada na tur famia, bario, skolnan rònt Kòrsou, radio emisora i kanalnan di televishon, institutonan privá i gubernamental, empresario i artistanan pa partisipá aktivamente na e siman di kultura aki. Laga nos kada un tuma tempu i reflekshoná awor mas ku nunka riba e ròl i importansia di kultura den nos komunidat. Graba bo aktividat, tayer, talento i/òf reflekshon i kompartí esaki riba bo propio kanalnan sosial usando hashtags #kultura2020, #reflekshonkultural i #simandikultura2020.
Den transkurso di e siman akí Gobièrnu lo sigui kompartí informashon di tur e diferente aktividatnan riba plataformanan digital i di ki forma bo tambe por partisipá na engrandesé nos reflekshon kultural.
