Notisia

Dia Internashonal pa Rekordá Komèrsio di Katibu i su Abolishon: 23 ougùstùs 2024

WILLEMSTAD – Na dezèmber 2022 gobièrnu di Hulanda a pidi despensa pa historia di trafikashon humano transatlántiko i sklabitut den e diferente partinan di Reino Hulandes. Aña pasá Rei hulandes tambe a pidi despensa pa partisipashon di famia real den esakinan. Esaki ta algu ku Nashonnan uní a deskribí for di 2001 ofisialmente komo krímen kontra humanidat.

Mará na e despensanan a bini reabilitashon di Tula pa su liderato den e mobilisashon di 1795, den kua representante di gobièrnu hulandes a deklará ku Tula no tabata kriminal den su lucha pa hustisia pa e pueblo ku tabata sklabisá den su tempu. Tambe a bini un kantidat di fondo hulandes disponibel pa proyekto di konsientisashon tokante e pasado di sklabitut i trafikashon humano. E fondonan akí ta repartí entre e islanan di Karibe Hulandes, Sürnam i Hulanda mes. E desaroyonan akí a trese apertura pa akshon di konsientisashon tantu den inisiativa di komunidat komo via gobièrnu. Na mes momentu nan a trese kontroversia tokante kon outéntiko òf kompletu e despensanan tabata, kon amplio òf profundo e reabilitashon i e finansiamentu di konsientisashon ta i kuantu por logra ku nan.

Na 1998 UNESCO a deklará 23 di ougùstùs komo Dia Internashonal pa Rekordá Komèrsio di Katibu i su Abolishon. A skohe e fecha akí komo ku durante anochi di 22 di ougùstùs pa 23 di ougùstùs 1791, tabatin un mobilisashon na e isla di Saint Domingue (awor konosí komo Haiti) ku a hiba eventualmente na abolishon di tráfiko humano transatlántiko. Den esaki, meskos ku den tur su otro aktividatnan, UNESCO ta sali for di e punto di bista di traha pa kultivá, sostené i yega na pas. Meskos tambe e ta sali for di Nashonnan Uní su deklarashon di tráfiko humano transatlántiko komo krímen kontra humanidat. E fecha di 23 di ougùstùs ta un chèns pa reflehá riba e susesonan históriko akí, i para ketu na tur loke mester sigui hasi pa evitá ku tipo di atrosidat asina lo ripití. Den e kuadro aki, tin regional manera CARICOM su plan pa yega na reparashon. Komo miembro asosiá resien di CARICOM Kòrsou tambe ta parti di e plataforma akí. Tambe tin kuadro internashonal di Nashonnan Uní, manera e vishon di kura e heridanan di sklabitut i di komèrsio di katibu. Diferente organisashon lokal tin trayekto di konsientisashon rondó di e tópikonan akí.

Laga nos kòrda ku e desaroyonan resien ta mará na hopi aña di trabou di aktivismo lokal i den Reino, diferente kuadro regional i mundial ku a atendé ku e historianan di horor akí, i trabounan aktual ku diferente grupo ta hasi. Laga nos uza e reflekshon ei pa sigui kultivá un kultura di pas i pa elevá nos propio komunidat, ku un intenshon di sana e loke mester sana di nos historia i selebrá loke ta di selebrá na forsa i resiliensia ku nos a demostrá pa algun siglo kaba.

—

KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte