Publiká riba 22 Desèmber 2017
Pa por logra ku tur asuntu ta kana di forma organisá durante selebrashon di Fuikdag durante e promé Djadumingu di Aña Nobo, outoridatnan kompetente, manera Ministerio di Hustisia, Polis, Warda Kosta, Inspekshon Marítimo, Kapitan di Haf, Servisio di Bombero, CITRO i otro servisio i instansianan konserní a reuní resientemente.
Meta di e reunion tabata pa determiná kriterionan i asina prevení ku kosnan ta salí for di man. Ta konosí ku embergadura di e evento aki a alkansá tal magnitut ku e riesgonan mara na dje tambe a oumentá di forma konsiderabel. No mas ku algun aña pasa mes e situashon ku a manifestá su mes durante di Fuikdag tabata unu bastante kaótiko, rason di kon bou di ningun sirkunstansia por permití e situashon aki di ripití su mes.
Algun di e medidanan tumá ta enserá entre otro ku:
A.) No ta duna pèrmit pa benta di alkohòl;
B.) No ta duna pèrmit pa músika públiko riba vlὸt òf podio;
C.) Tur boto ku ta partisipá na e evento, aparte di nan dokumentonan, mester tin sufisiente vèst di salbabida abordo (konforme kantidat di pasahero abordo), ademas artefaktonan apropiá di señal, flùit etcetera;
D.) Ademas Servisio di Bombero ta efektuá kontrol pa loke ta sendementu di kandela abordo pa preparashon di Bar-B-Que;
Ta bon pa tene na kuenta ku e asuntu di hiba i trese hende tambe no ta keda permití mas; ku otro palabra hende ku tin nan propio boto so por yega Fuikbaai. E medida aki a bira nesesario, pasombra tur aña di nobo ta resultá ku hendenan ku tuma ‘kabe’i ’boto’ (lif) ta keda pegá na Fuikbaai sin por yega Caracasbaai; konsekuentemente nan ta purba kana via tereno privá di Barbara Beach pa yega siudat. Tur esaki únikamente ta kontribuí na mas káos i komo tal no ta keda tolerá mas. Selebrashon Fuikdag mester bai bèk su orígen i komo tal e reglanan stringente ariba menshoná.
Ta bon pa un i tur tuma bon nota di e reglanan aki, pasombra outoridatnan ta bai aktuá ku man firme pa garantisá ku tin órden i seguridat durante selebrashon di Fuikdag.
Minister di Hustisia
