Reglanan pa propaganda polítiko den áreanan públiko - Informashon tokante Gobièrnu di Kòrsou Bo opinion

Notisia

Reglanan pa propaganda polítiko den áreanan públiko

Geplaatst op 12 November 2020 dor di Ministerio Tráfiko, Transporte i Planifikashon Urbano

WILLEMSTAD– Servisio pa Planifikashon Urbano (ROP) ta informá tokante reglanan vigente pa propaganda polítiko den áreanan públiko. Por trata aki di bòrchi, bandera òf kualke otro opheto. Tur partido polítiko por pone nan propaganda polítiko segun e maneho di propaganda,. Esaki ta for di dia ku entregá lista di partido polítiko pa elekshon, te ku 8 dia despues di fecha di elekshon di aña 2021. ROP ta hasi un apelashon na tur partido pa nan tene nan mes na e reglanan.

Resientemente Konseho Elektoral a anunsiá ku e fecha di e próksimo elekshon lo tuma lugá den luna di mart di aña 2021. Konsekuentemente, e fecha pa kuminsá pone propaganda polítiko ta mará na e fecha ku ta entregá lista polítiko pa elekshon 2021. Esaki ta pará den nos “Landsverordening Openbare Orde” (LOO) artíkulo 16 insiso 4.

Pa seguridat di nos komunidat den áreanan públiko i kuido di nos mobilario di kaya, ta importante pa tene na kuenta ku e propaganda no tin mag di:

  • Kousa daño físiko na kaya òf ophetonan den área públiko;
  • Forma un estorbo pa uso efisiente di e área públiko;
  • Opstakulisá e aksesibilidat di e área públiko;
  • Forma un opstákulo pa seguridat den tráfiko;
  • Stroba mantenshon di e área públiko;
  • Forma molèster òf shushedat;
  • Hasi daño na e bista di e área públiko.

Otro eksigensia ku mester kumpli kuné den kuadro di órden públiko ta:

  • Propaganda iluminá, propaganda riba dak òf propaganda vertikal, riba mas ku un piso, ta pèrmití solamente den áreanan di negoshi i áreanan di tienda. E tipo di propaganda aki no ta pèrmití den nos sentro di siudat;
  • Propaganda ku ta move òf kambia, propaganda ku lus, inkluyendo ‘billboards’ digital, por kousa peliger pa tráfiko. P’esei promé ku pone nan, mester konsultá ku ROP tokante e sitio, e intensidat di lus, e frekuensia di kambio i moveshon, i e manera ku ta posishoná nan na lado di kaya. Asina ROP por evaluá si e manera proponé ta posibel;
  • No ta pèrmití pa propaganda stroba bista di usuarionan di tráfiko di ningun forma. Esaki ta konta prinsipalmente pa krusadanan. No ta pèrmití pa pone propaganda di tal manera ku e ta trese peliger den tráfiko. No ta pèrmití pa pone propaganda riba rotònde;
  • No ta pèrmití pa pone propaganda na mobilario públiko, bòrchinan di kaya i di tráfiko, solamente na palu di lus i no na mata den área públiko. Ademas mester peg’é di tal manera ku e por kita fásilmente despues;
  • No ta pèrmití buta niun klase di propaganda riba brùg Koningin Juliana;
  • No ta pèrmití pa pone “driehoeksborden” òf “sandwichborden”;
  • No ta pèrmití pa pone propaganda ku zonido;
  • Propaganda den forma di bandera ta pèrmití solamente den área di negoshi òf área di tienda. Esaki no ta pèrmití den nos sentro di siudat;
  • No ta pèrmití propaganda ku no ta di material sólido i duradero;
  • No ta pèrmití parker vehíkulo, trailer i/òf otro ophetonan mobil ku propaganda riba dje, riba òf banda di kayanan públiko. Esaki ta pèrmití solamente riba tereno di parker.

ROP ta traha duru pa ordená i manehá e parti di propaganda polítiko. Di e forma akí, nos komunidat por simpatisá ku nan eskoho personal na un manera bon strukturá. ROP ta pidi tur partido polítiko pa mantené nan mes na tur regla i eksigensia eksistente.

Pa mas informashon tokante eksigensia di tipo di propaganda polítiko, por tuma kontakto ku ROP na +5999 433 3200 òf whatsapp +5999 511 3874. Tambe por mail na info.rop@gobiernu.cw.

 

 

Ministerio konserní