Rei ta papia ku gobernadornan di Aruba, Kòrsou i Sint Maarten tokante krísis di Corona - Informashon tokante Gobièrnu di Kòrsou Bo opinion

Notisia

Rei ta papia ku gobernadornan di Aruba, Kòrsou i Sint Maarten tokante krísis di Corona

Geplaatst op 23 April 2020 dor di Ministerio Asuntunan General i Promé Minister

Riba djaweps 23 di aprel Su Mahestat Rei Willem-Alexander a kombersá ku e gobernadornan di e tres paisnan di e parti karibense di Reino den kombersashonnan telefóniko separá. El a laga gobernador Boekhoudt di Aruba, gobernador George-Wout di Kòrsou i gobernador Holiday di Sint Maarten inform’é tokante e situashon relashoná ku Corona Vírùs (COVID-19) den nan pais i e konsekuensianan di e medidanan ku a tuma pa evitá plamamentu di e vírùs.

Rei Willem-Alexander a ekspresá su sosten na e gobernadornan i e pueblo di e tres islanan. Ademas e tabatin gran apresio pa e forma ku e trahadónan den kuido i otronan embolbí ta komprometé nan mes di dia i anochi pa enfrentá e krísis. El a hasi esaki tambe na nòmber di Reina Máxima. Pa motibu di e brote di Corona, Aruba, Kòrsou i Sint Maarten ta afektá pisá riba tantu tereno médiko, komo ekonómiko i sosial.

Riba djabièrnè 3 di aprel Rei a tuma parti na e konferensia di video diario entre e tim di krísis Hulanda Karibense di VWS i e timnan na Boneiru i Sint Eustatius. E kombersashon aki tabata parti di e bishita di trabou na e ministerio di Salubridat, Bienestar i Deporte (VWS) (komunikado di prensa di RVD number 64). Rei e dia ei tambe a ekspresá su sosten i agradesimentu na e islanan BES.

Pa medio di kombersashonnan telefóniko i bishitanan di trabou te asina leu ku esei ta posibel, Rei Willem-Alexander i Reina Maxima ta laga informá nan mes tokante konsekuensianan di e brote di Corona i ta ekspresá nan sosten i agradesimentu pa e esfuerso di asina tantu hende pa kombatí e pandemia.

Ministerio konserní