Publiká riba 14 Desèmber 2022
Willemstad- Despues di e desishon di korte pa loke ta trata kambionan den e areglo di Makutu Básiko (Makutu Básiko 2022), Ministerio di Desaroyo Ekonómiko (MEO), huntu ku minister Ruisandro Cijntje, a sigui ku esfuersonan pa di forma inovativo i kreativo tòg pone e ekonomia di Kòrsou bèk riba pia. Den kuadro di esaki, Minister Cijntje huntu ku MEO a bin ta deliberá ku stakeholdernan relevante (supermerkado i importadornan) i a yega na e desishon pa temporalmente reintrodusí e areglo di Makutu Básiko 2012. Esaki ta sosodé pa medio di un Areglo Ministerial i ta keda introdusí pa un periodo di seis (6) luna.
Den e periodo di seis luna aki, Minister di Desaroyo Ekonómiko lo instalá un ‘Task Force’ enkargá pa kondusí un investigashon profundo riba e efisiensia i efikasia di Makutu Básiko i e posibilidatnan pa eventual alternativanan. Si akaso despues di seis luna resultá ku e ‘Task Force’ tin mester di mas tempu pa nan investigashon, tin e posibilidat pa prolongá e Areglo Ministerial ku algun luna mas pa duna nan e espasio pa terminá e investigashon.
E Areglo Ministerial den kua ta reíntrodusí Makutu Básiko 2012 ta inkluí entre otro produktonan manera aros, lechi, pan i algun fruta i berdura. E areglo den su totalidat ta disponibel riba wèpsait di Gobièrnu.cw pa un i tur ku ke tuma nota di dje.
Preisnan di komestibel ta subiendo strukturalmente durante e último lunanan debí na faktornan manera COVID-19 i e guera entre Rusia i Ukrania. Esaki ta un desaroyo internashonal ku sin mas ta afektá nos merkado lokal tambe, mas aun mirando ku nos ta un pais sumamente dependiente di importashon. Ta e deseo i e deber di Gobièrnu pa sòru pa nos komunidat tin akseso liber i hustu na produktonan vital. E reintrodukshon temporal di e Makutu Básiko 2012 ta sòru pa esaki miéntras ta warda e konklushon di e ‘Task Force’.
