Publiká riba 14 Sèptèmber 2023
Willemstad – Servisio pa Tráfiko i Transporte (UOVV) ta hasi un apelashon na tur persona ku tin un pèrmit, karchi di shòfùr ousiliar, òf eksonerashon pa sea bùs chikí, mediano, ‘toerwagen’ òf taksi, pa nan laga renobá esaki na tempu.
Konforme nos lei di transporte públiko art. 2 (AB 1992, no 7), tur persona ku ta transportá òf laga transportá persona kontra pago mester tin sea un pèrmit, eksonerashon òf karchi komo shòfùr ousiliar bálido.
(UOVV) ta urgí tur persona ku tin nan pèrmit, eksonerashon òf un karchi komo shòfùr ousiliar pa nan entregá nan petishon pa renobashon un mínimo di 3 luna promé ku e fecha di vensementu.
Tur persona ku tin pèrmit di sea bus òf taksi, ku si dado kaso pa kualke motibu nan mes no por kore i ta laga otro persona kore, e persona aki tambe mester tin su karchi komo shòfùr ousiliar bálido. Riba e karchi mester tin e number di bùs òf taksi, i stèmpel di e UOVV riba dje.
Tene kuenta tambe ku art. 13 di e lei di transporte públiko ta indiká den kua kaso por hasi uso di un shòfùr ousiliar. E motibu aki tambe ta wòrdu dokumentá ora ta firma pa un shòfùr ousiliar.
Pa risibí tur informashon i pa apliká pa un petishon pa renobashon di un pèrmit, eksonerashon, òf karchi komo shòfùr ousiliar, por subi ribe e website www.trafikoitransporte.com òf por tuma kontakto pa un sita na UOVV via telefon 839-2149, 839-2143 òf 839-2147 òf via email tp.uovv@gobiernu.cw.
