Renobashon karchi di bankomátiko pa kobradónan di ònderstant - Informashon tokante Gobièrnu di Kòrsou Bo opinion

Notisia

Renobashon karchi di bankomátiko pa kobradónan di ònderstant

Geplaatst op 05 March 2020 dor di Ministerio Desaroyo Sosial, Labor i Bienestar

Willemstad – Kobradónan di ònderstant ku nan karchi di bankomátiko ta kaduká na mart benidero por akudí na e Kasnan di Bario konserní pa tuma un karchi di bankomátiko nobo. Esaki por den siman di 09 pa 13 di mart i di 16 pa 20 di mart benidero entre 8’or pa 11’or di mainta i mitar di 2 pa 4’or di atardi.

E repartishon di e karchi di bankomátiko nobo lo sosodé segun e lista alfabétiko, pa tur e dos simannan. Klientenan ku nan fam ta kuminsá ku lèternan entre A i F por pasa djaluna 09 mart 2020, klientenan ku nan fam ta kuminsá ku lèternan entre G i M por pasa djamars 10 mart 2020 i klientenan ku nan fam ta kuminsá ku lèternan entre N i Z por pasa djárason 11 mart 2020. Djaweps i djabièrnè e klientenan ku no a presentá riba e dianan menshoná por pasa.

E tumamentu di karchi konforme e partishon di fam ta bálido den tur dos siman. E klientenan mester presentá ku e karchi bieu i un sédula òf reibeweis bálido ora bin buska e karchi di bankomátiko nobo. E kódigo di pin ta keda meskos. Ta trata di e klientenan di Ministerio di Desaroyo Sosial, Labor i Bienestar (SOAW) ku a haña karchi di bankomátiko na mart 2016. Nan karchi ta bai kaduká na mart 2020.

Pa evitá tur inkumbiniensia, Ministerio di Desaroyo Sosial, Labor i Bienestar ta urgi tur kliente pa pasa tuma nan karchi na tempu, pasobra e mashin ta guli e karchi si usa esaki despues ku e kaduká.

Ministerio konserní