Notisia

Reservashon pa èksamen di reibeweis práktiko

Geplaatst op 05 October 2020 dor di Ministerio Maneho di Gobernashon, Planifikashon i Servisio Públiko

Willemstad – Departamento di Reibeweis (Sta. Rosaweg) di e ministerio di Maneho di Gobernashon, Planifikashon i Servisio Públiko, ta informá ku entrante djárason 30 sèptèmber 2020, tur kandidato ku mester a pasa èksamen práktiko na luna di yüli i ougùstùs 2020 por pasa personal pa reservá un fecha nobo.

Kandidatonan ku tabatin sita pa èksamen den periodo di 16 mart te ku 30 ougùstùs 2020 ku a keda kanselá pa motibu di COVID-19, tambe por pasa reservá fecha nobo pa pasa nan èksamen. Esaki ta konta tantu pa kandidatonan ku a pasa nan eksámen teóriko ku éksito promé ku 1 di yüli pero tambe esnan ku a drùip pa nan eksámen práktiko i mester pasa esaki di nobo.

Kandidatonan ku a pasa nan èksamen teóriko ku éksito despues di 31 di ougùstùs i esnan ku drùip pa nan èksamen práktiko despues di e fecha aki, no ta bin na turno ainda pa un sita pa eksámen práktiko.

Tur kandidato ku si ta bini na remarke por pasa personal na ofisina di Departamento di Reibeweis (Sta Rosaweg) di djaluna pa djabièrnè for di 8’or di mainta te ku 15’or di atardi.

Konsiderando e “Normal Nobo” i medidanan di seguridat i higiena ku nos mester atené na dje, Departamento di Reibeweis ke duna e siguiente instrukshonnan pa tur persona ku mester bishitá e ofisina na Sta. Rosaweg:

• Komo medida di prekoushon, no por aseptá mas persona ku e kantidat di stul disponibel den e sala;
• Mester desinfektá mannan na momentu ku drenta e ofisina i mantené dos (2) meter di distansia na tur momento;
• Uso di tapaboka (mondkapje) den e sala ta obligatorio;
• No presentá na e ofisina si bo tin síntomanan di fèrkout òf bo tin keintura;
• Si resultá ku bo ta sinti kebrante di salú, apoderá bo instruktor pa kambia fecha di bo èksamen;
• Traspaso di tur dokumento ta sosodé únikamente riba e bali i no direktamente den man di e persona.

Na momentu di pasa èksamen práktiko tur kandidato i instruktor mester tene kuenta pa:

• E vehíkulo tin un bòter di alkohòl 70% i lensu di papel disponibel den dje;
• Limpia/desinfektá mannan di porta, stürwil, faha nan di seguridat i palanka di spit òf di transmishon di e vehíkulo ku ta uza pa pasa e eksámen (den presensia di e eksaminadó).

Si akaso e vehíkulo pa pasa eksámen no ta den un estado limpi i higiéniko, e sita pa èksamen por keda kanselá ku e konsekuensia ku e kandidato por pèrdè su oportunidat.

Pa mas detaye por wak e video athunto òf bishitá www.gobièrnu.cw/.

E medidanan aki ta keda apliká den kuadro di protekshon kontra infekshon di COVID-19 pa tantu e kandidatonan, empleadonan i eksáminadónan.

Pa mas informashon por tuma kontakto via number di telefòn 736-2929. Tambe por manda un mail na rijbewijzen.puz@gobiernu.cw.

Ministerio konserní

• Maneho di Gobernashon, Planifikashon i Servisio Públiko