Retraso den pago di NOW pa luna di mei; aplikashon pa luna di yüni lo ser adelantá - Informashon tokante Gobièrnu di Kòrsou Bo opinion

Notisia

Retraso den pago di NOW pa luna di mei; aplikashon pa luna di yüni lo ser adelantá

Geplaatst op 07 June 2020 dor di Ministerio Desaroyo Ekonómiko

WILLEMSTAD – Manera sigur e kompanianan i empleadonan por a ripará lamentablemente e pago di areglo di NOW pa luna di mei tin un retraso. Esaki tin di haber por parti ku e portal a habri mas lat ku tabata intenshoná debí ku mester a warda riba konfirmashon di finansiamentu di parti Hulanda. Den luna di mei e portal a habri 6 dia mas lat ku den luna di aprel. Banda di esaki tambe a kosta mas tempu pa traspasá e informashon di personal manera el a ser entregá den e portal pa e sistema di SVB. Ya ta konosí ku pa e aplikashon di luna di aprel di NOW, e informashon di personal di hopi kompania no tabata aktualisá den e sistema di SVB. Aworakí a purba hasi e kambionan (mutashon) ofisial mésora den e petishon di mei riba kua lo hasi e deklarashon di ZV/OV pa salario i riba kua tambe lo paga supsidio di salario. Di e forma aki kada kompania i tambe Ministerio di SOAW por mira pa kua empleado a paga.

E intenshon ta pa den transkurso di otro siman e promé pagonan keda hasí dor di SVB pa luna di mei. Tambe lo bai kuminsá hasi e pagonan pendiente pa luna di aprel pa direktornan statutario i korekshonnan di supsidio di salario pa kompanianan ku nan deklarashon di ZV/OV tabata mas haltu ku e pago di supsidio di salario ku nan a risibí a base di nan lista di personal na fin di febrüari 2020.

Pa luna di yüni lo ta diferente ya ku e finansiamentu di Hulanda ta konfirmá kaba. P’esei e portal pa aplikashon di NOW pa luna di yüni lo habri 15 di yüni awor. Mas informashon pa ku e kondishonnan ku lo ta aplikabel pa e luna di yüni, lo komuniká otro siman.

Ministerio konserní