Publiká riba 06 Mei 2024
Willemstad – Riba dianan 7 i 8 di Mei próksimo lo tuma lugá na Kòrsou e di diesun reunion di Komité di e Sentro di Aktividat Regional ku ta duna training riba polushon di laman den Karibe, konosí komo RAC/REMPEITC-Caribe. Representantenan di diferente organisashon internashonal i lokal, tantu gubernamental i no-gubernamental lo topa otro na e konferensia na Renaissance Hotel.
RAC/REMPEITC-Caribe ta para pa ‘Regional Activity Centre / Regional Marine Pollution Emergency, lnformation and Training Centre’. Esaki ta un di e kuater Sentronan di Medio Ambiente di Nashonnan Uní (United Nations Environment Program – UNEP).
Na 1995 Gobièrnu di Kòrsou a instituí e sentro aki na Kòrsou ku ta konsistí di ekspertonan asigná pa medio di e konvenio di Kartagena 1983.
Aktividatnan di e sentro ta supsidiá pa e Organisashon Marítimo Internashonal (IMO), UNEP, Programa di Desaroyo di Nashonnan Uní (United Nations Development Program -UNDP), huntu ku Gobièrnu di Kòrsou.
E meta ta pa: 1) asistí i konsehá paisnan den Karibe riba prevenshon i redukshon di polushon di laman dor di desaroyá i evaluá plannan di kontingensia nashonal i multilateral, 2) organisá training i tayer, 3) duna sosten tékniko i konsulta, 4)informá i konsientisá públiko.
E meta prinsipal di e seshonnan di e reunion ta ekstenso. Ta bai aprobá e plan di trabou di 2024 pa 2026 di RAC/REMPEITC-Caribe, i lo revisá e plan stratégiko di término largu di e sentro pa aktualisá esaki pa 2025-2030. Ademas a krea tempu pa kada organisashon presente kultivá e koperashon ku otro, pa huntu sirbi e region di Karibe mas mihó.
E organisashon RAC/REMPEITC Caribe tin mas ku 25 aña na Kòrsou i ta resortá direktamente bou di Minister di Tráfiko, Transporte i Planifikashon Urbano. E ta ubiká na Edifisio Siegfried Fransisco na Seru Mahuma. Pronto e sentro ta ekspandé ku dos eksperto, unu di Trinidad & Tobago i unu di Industria Petrolero huntu ku un eksperto di US Coast Guard. Pa mas informashon tokante e sentro por bai na www.racrempeitc.org.
